洪禮賢講馬YIN''''''''S TALK：往績結構好重要

魑魅魍魉

　　承接前文， 像玩捉迷藏，去「捕」1匹馬的方法及思量，你與我的法門不會一樣，而相同之處都在於到最後，大家想得到好的結果，贏錢離場。

　　光是過程之中，如何刺激、鬥智、拆局、峰迴路轉等等，雖然係享受過，久而久之冇「彈藥」嘞，你便沒有再玩的資格。

爆攤例子唔多

　　衡量某駒機會係咪到位，往績結構的形態是何等重要，明明某駒贏完例冇兩鋪，你硬係要夾叠買落去，只有填氹份兒。此外，A駒過去跑了多季，係跳唔出四班這道牆，升到三班唔輪到佢話事，但你以為贏開有勢，未必怕阻力，但賽後結果話你知，往績冇呃你，只係你唔信自己隻眼。

　　無疑，賽馬沒有不可能，唔係自打嘴巴，只係爆攤的事例唔會出現得過分頻密，往績的大方向係咁，就算忽然轉調，點都有個譜。至於上季爆攤個案之中，對於「喜在心頭」較有印象。連同剛季在內，佢已經跑了接近6年，往績的真確性好成熟，而根據往績顯示，向來贏完再出Ｐ都冇，不論勝後係咪跑相同路程、有冇升班、轉換騎師等等，總之翌仗名次未試過入到前四名。但上季3月中在谷草1200米勝出後，再出在相同路程幾乎贏埋（17倍入Ｑ），確係「震驚」的賽績，始終邊個會諗到7歲中年馬，仍有本領爆攤呢。

　　又或者早幾日提及的「超力好」破四季數據，首次打叠上名，仲要係連捷，亦係上季爆攤經典例子之一。

洪禮賢 馬會賽馬節目主持