閒話一句：一路易出頭在望

港陌

　　昨晨早課近半場休息時段，第二場「一路易」現身補課，嘉豪本來已經準備洗淨手食個包，但基於自上月底參加泥地大閘之後，此駒一直只縮埋踱步儲體力， 這才是首次大圈亮相，故重新拿起望遠鏡連汁都撈埋。

　　畢竟是賽前一天，「一路易」這課工夫跳得不快，看來只是想讓牠鬆鬆腳頭而已。不過慢有慢好睇，特別是當牠完成試跑，在對面跑道愈行愈見爽勁，流露出一副唔多夠喉姿態，近況起得相當滿意。

　　去季末「一路易」首度代表鄭廐出戰，已經屆於可參加五班賽事評分的牠，卻被安排到四班作泥地初試啼聲。結果在勞愛德滋油淡定發揮，遊一輪花園才施施然稍追前下，連競賽小組也忍不住開聲警告。不知道是否刻意作隔季部署，但既然見識過「一路易」在草地上的飛快速度，又明白牠留住追原來一樣厲害，加上狀態理想配搭硬淨，應該是出頭好機會，嘉豪當然不會錯過搭這轉順風車。

齊鼓掌最後試跑靚

　　揀腳先取「齊鼓掌」，不顧及霍廐馬首輪瓜多過菜的話，秤能力其實不一定弱於「一路易」，純計最後試跑那課，觀感已經相當不俗。韋達很早已經吼中「金巴利來」，去季中跑得接近後一再排外檔，可以說是失運，今次落班檔佳而做夠準備。餘下「齊齊掂」以開鑼日蝕位程度計，那席第六不算差。

主持　黄嘉豪
馬會賽馬節目主持