朝早有動靜：大旋風有航

猪拉多纳

　　昨朝為周日賽事排位之期，機坪沙圈不少騎練聚在一起密斟，計有葉楚航與韋達、柏寶、鄭雨滇，何良跟黎海榮、鄭雨滇，苗禮德和蔡明紹、馬偉昌、勞愛德，此中有些騎練今次賽事雖沒有交易，未雨綢繆，仍要留意。葉楚航支持華將一向不遺餘力，與鄭雨滇更是合作無間，昨朝二人傾談良久，今次賽事，他倆合作之馬有「幸運相架」、「大旋風」，昨課俱由滇仔出試，期間騎練不斷咬耳仔，鏡頭甚為矚目，不妨多加參詳。

　　列陣第六場之「幸運相架」，鄭雨滇復課後一直負責出試，連踱步也不假手於人，重視有加，此匹五歲馬大熟當打，今季晨課表現愈來愈淡定，近日多操下已見收身甚靚，出腳開揚上力，毛水立立令，更趨成熟進步，今季初出即報名出爭贏馬途程，配合其他動靜，實為出擊之兆，宜盯緊。第七場「大旋風」以往曾兩度於田草上名，周日跑1000米亦合，必有分頭，吼緊。

　　何良一向鮮有到機坪睇馬踱步，但昨朝同埋馬主叻哥到來，甚有瞄頭，今次出賽馬「清風送爽」由副練親自踱步，何良一直在旁目不轉睛睇到實，看來有計。　

韋柏