馬主論戰

魑魅魍魉

星光妙韻拔頭籌

　　雖然何良剛戰冇馬贏，但跑五次馬贏咗四場，表現其實已經好出色，今日何廐出馬唔少，應該又有攻勢。最鍾意頭場「星光妙韻」，雖然唞咗好耐冇跑，但早排試泥閘走勢唔曳，況且落到五班真係好着數，有力先拔頭籌。另外鍾意第三場「好旺財」，上季尾已經連場入位，今次再用韋達操刀必打硬仗，係時候打開勝門。

張敬山

最上後勁凌厲

　　跑過幾次賽事，鄭俊偉馬房仲未開齋，不過今日佢手馬幾惡，話唔定會有突破。先揀第二場「皇仁神駒」，以往響三班可以同「威威財星」、「星火燎原」等惡馬跑近，依家身處四班根本虎入羊群，轉鄭廐初出隨時省招牌。另外鍾意第六場「最上」，上場跑直路賽末段走勢凌厲，熱身後轉跑贏過嘅谷草1200 米，贏得。

寇鴻萍、梁廷鏘

馬有成換人要吼

　　記憶中谷草日賽不時會有冷門賽果，睇嚟今日揀馬都係冷敲熱避為上。先推介第五場「馬有成」，雖然以往未試過響谷草一哩取勝，但贏過谷草1200 米、亦贏過泥地一哩，呢程冇理由唔啱，上仗熱身後今次換白德民要吼實。另外推介第六場「辣得喜」，四歲馬肯定有分在手，轉嚟谷草上陣會換來分頭，隨時掃晒。

任達華