洪禮賢講馬：讚賞唔怕升班

猪拉多纳

　　今日有唔少重心熱門馬上陣，好些更只得十幾廿蚊貨仔，感覺上，贏少一隻都唔得嗰類格局！而今期部分成績在中游位置的馬房兵力唔錯，好似胡森、霍利時、姚本輝三廐，不妨多加留意吓。

重心場次：第10場 第二班（100-80分） 1200米草地

　　「讚賞」剛賽前已解釋過上季之敗唔係冇水準，所以上場贏馬冇咩出奇，快時間之下完成，引伸到升上二班也不用怕，尤其係只負112磅，對呢類年青兼經驗少嘅馬好有幫助。

　　「風雲勇子」內斂之後在陣上轉化成力量，而轉場唔覺有問題，正路腳。「步步快」起而未足，但假如因應劣檔肯drop後跑，效果可能更好。「綠續有贏」及「旅英駿駒」唔係冇能力，一對馬都可考慮。

　　「戰河」上場冇料到，論態唔係冇。「安御」則有少少肥，跑完今場會到位。「火箭動力」有級數但未夠「方」。「開心動力」外檔及轉場，形勢與上場係唔同晒。

第1場 第五班（40-15分） 1400米草地

　　「私家路」季前準備未算好密，進度唔係十足，但太超級了，或者都係殺，趁呢次仲有少少分頭，唔博就冇得博。

　　「幸運來」上季尾已指出嚴重內閃的走規已改善了，陣上亦交出不錯的能力，落番班，冇理由冇惡氣。「沙田寶」暑期後係有進步，過急的性格再收斂多少。

　　「晨速」及「智勇非凡」三重彩配腳。「瀟洒良駒」減分太快，隨時可以反彈。「大衛金剛」和「德雲歡欣」納於邊線。

第2場 第四班（60-40分） 1200米草地

　　「父子兵」上仗初出衰在中途騎者唔落力，如果唔係，好有機會入Ｑ，大件頭馬遲撻着冇計。今次即加程，無非要交代。

　　再數落去，「甜將」及「香檳歲月」係主要對手。「飛躍之鋒」眼見未夠，因早前落草地走勢唔多主動，但縮程則有威力；「好得意」暑期後印象唔錯，一對馬都可冷敲。

第3場 第四班（60-40分） 1650米泥地

　　「贏啲啲」轉手前後，在準備上沒有分別，有大閘先上陣，初出跑一哩唔會應付唔到，上季賽績咁準，可信性大。「威猛情人」跑完一場對狀態係有提升作用。

　　「卓爾不凡」冇得揀，係得番死路程，扳到韋達實砌。「越戰越勇」對上仗第五名的水準有保留。「暖在心頭」唔會貿貿然轉場地，就算在邊緣分數，未必係等降班。「實業輝煌」唔係９檔，可能會揀。

第4場 第五班（40-15分） 1800米草地

　　「萬子千紅」開氣後轉向長途合理，如果肯在跑法上略加進取，大變身唔奇。「彩旗飄飄」與「馬霸龍」俱有了一場熱身賽，加程只會更好。

　　「太陽奇妙」唔鍾意上場過蝕的處理，但對佢性情轉變了的睇法冇改觀，希望今場內檔會有唔同演繹。「駕世鞍」慢放的戰略，未必可一可再。「爆發力」以為要開氣才好，點知一出幾乎贏埋，不過，此程向來唔掂。「瀟洒大少」係跑班啫，睇近試表現，一個字：「鈍」！

第5場 第四班（60-40分） 1400米草地

　　「高耀之威」根據近季賽績，向來有急攻意圖，既然上場谷草一哩已有唔錯走勢（沿途外叠蝕，頂到最後200米），轉回此程只會更佳。「信賴」班內中堅，路程又啱，遇弱旅唔難再上名。

　　「聚有盈」上場太差，冇心再追。「真係寶」冇乜證明過，但減分多而工夫做得夠，有得博。「勵盈」開操後唔使就住係好現象。「愛拼者贏」上番班，少負17磅，可能搭夠。「甜蜜至上」大外檔可能影響幾多，因今場早段未必快。

第6場 第四班（60-40分） 1200米草地

　　「讚惑」就算冇大閘，課期算足夠，樣靚腳法瀟灑之馬，八成馬都夠贏。「長勝」與柏寶最夾，加上休出亦有幫助。「聖河」上場蝕位照贏好神奇，但轉場已不同。「寶貝」降半班好跑，惜草地差啲。「進取」好開，但唔理解換人意向。

　　「新蝦王」暑期後試跑感覺好，能力應會升級。「龍得風雲」剛仗軟地造22秒幾拉士好勁，不過，變番重磅及轉程，未必一樣咁勁。

第7場 第三班（80-60分） 1200米泥地

　　「勁飛馳」初出跑法蝕到暈，輸唔到兩個身位，有點不可思義，換上經驗較豐富的小蘇，有心搏過。「八發八中」上場大勝係有點戒心，不過論進度在此數一數二。

　　「時代明星」及「人緣好馬」一對專家可作腳。「駔驍駿駒」試跑夠彈力及有火，暑期後有變數。「神殿」唔再突破啩？！「一定快」排外檔，驚處理唔好。

第8場 第三班（80-60分） 1600米草地

　　「千江映月」上賽唔夠鬥，只因頭馬太進步，入Ｑ恰如其份，好開則有穩健性。

　　「天瞳」及「揀得正」一對馬剛仗各有不同吸引程度，要揀。

　　「豪情拍檔」未夠，勿因近績而過分熱情。「寶利多」與「多贏勁駒」唔似贏得，但一席唔難攞。「非常好」工序做得妥當，唯一係跌磅太多，唔知對發揮有多大影響。

第９場 第三班（80-60分） 1400米草地

　　「高一線」上場唔係攞位問題，應該有Ｐ。此廐馬熱身之後會更好，只要發揮唔好再錯，成績必可提升。「生生不息」已比以前乖，唔再急識留力，預期威力會增強。

　　「飛躍王子」怕冇大閘，會蝕啲。「好有勝」揀開，既有好表現，再追。「黃金褭蹄」性情漸漸改了，好快到位，有賠率更可博定先。「精算攻略」又係冇大閘，驚未入局。「金鑽龍華」此程如有好位，唔會應付唔嚟。