洪禮賢講馬：中華英雄 實戰撐起狀態

猪拉多纳

　　啱啱禮拜三賽事，有隻馬好值得嘜低，此為「卡加精神」，但不得不承認現階段係未夠狀態，身型未收好，連續兩場亮相時，隻馬外觀仲係身圓圓（剛仗冇咁泡了），所以陣上嘅前跟力，明顯不如上季入圍嗰兩場咁快腳，不過，亦因為未夠水準，剛賽可在劣勢下跑得近，引證到三班唔會冇得揮，目前在63分水平，係咪會「向下望」，不盡然啊！

　　事實上，如果剛仗唔係中段開始畀前面嘅「高飛飛」干擾，能夠喺直路頭早啲擺正軚，以佢23秒內嘅拉士（末段締速拍住頭馬），要爆上嚟入Ｐ唔難。當然，下次見佢之時，後庄嗰堆bye-bye肉冇晒先再講啦，如果唔係，仍未建議「拔鎗」。

　　今期賽事，有4場跑泥地，有短途，也有一哩，表面上季內泥地賽事都係後上馬贏，細心睇真啲，前置型馬唔係完全失利（不論好慢泥地），所以，今期幾場泥地賽唔好一味執晒一批後上馬。

　　頭場四班1200米泥地。「中華英雄」前仗同程放得過快（頭兩段快過同日三班逾3線），輸得遠好正常；到了上仗早段亦唔慢，有Ｐ算叻。從兩役表現作比較，拉士愈來愈韌，反映借助實戰從新撐番起狀態。望落今批對手，冇邊匹快過佢，又冇邊匹檔位好過佢，有望由頭帶到尾，取得季內首W。