借題發揮：大摩10月成績起飛

魑魅魍魉

　　大摩馬房今季態度唔同咗，季初冇咁「爆」，未至於歎慢板，成績退步就唔可以否定，因為前季單單係9月，已攞到7場頭馬，上季差啲都有5W，今季只得3 場，縮晒水啦！好在佢喺10 月唔再靜嘞， 除咗對上兩期有3W，喼住有勢頭，再深入啲去睇，呢個馬房喺10月嘅成績，明顯穩定好多，嘩！派23匹馬出嚟跑，有15駒入到前五名，你估咁易喼到！ 所以話，10月呢個倉一定續有大動作。

　　既然之前兩期冇咗主帥白德民都贏完再贏，呢次冇咩好怕，而睇番大摩點分配啲兵源啦，勞愛德有6隻、柏寶兩件、俊仔1隻，雖然唔係話多就有用，但德叔嗰幾隻好似四正好多噃。

　　「甜將」及「讚惑」，上次約埋同日贏，呢次又有相同部署，不過，前駒加咗磅，後駒升班兼轉程，計落冇咁易連勝，但講到尾，呢對馬分利就梗嘅，如果進度追到，未必克服唔到。而「飛躍王子」，唉！上場尷尷尬尬跑個殿軍，賽後畀人鬧爆咁滯。好彩今場轉人及加程，未必要等消案，總之未交代，情況就好似禮拜三「卓爾非凡」咁，實會到盡！

Jack