洪禮賢講馬：時下流行跑法超錯？

博彩老头

　　世事往往好奇怪，唔知係用潮流、趨向、巧合，定係咩形容詞最貼切，總之嗰排興啲咩，喺嗰個field就自自然然重覆嗰種嘢，或有疑似形態出現。

　　譬如好多年前，電視台劇集啲對白好興兩個字「理解」，嘩，嗰輪幾乎係時裝片，唔理係談緊情，還是鬧大交情節，總有句「理解」跟尾：「好理解你愛我啲咩」、「好理解因咩原因嘈我⋯⋯」

　　咁近期馬場又興咩呢？最hot嘅可能係跑法超錯囉。唔使細心逐場逐場去搵番季內130場賽事，隨意用個腦諗一陣，已可抽出一部分名單，「賞惑」、「鎖定目標」、「輕輕鬆鬆」等，其實仲有好多好多例子可以講，十隻八隻梗走唔甩，但嚴重程度各不同，當係自己記性唔好或者懶惰，唔提嘞。

　　單係上述3駒，佢地嗰3場喺賽後出現過邊啲字眼呢？計有：「確保不會讓坐騎做力所不及的事」、「騎法未能顯示必需的判斷水準及主動性」、「確保坐騎有最佳機會獲勝或取得最佳名次」。純以個人理解，字眼上其實已幾嚴重，如果當時有咩差池，九成應該要被罰。

　　筆者已經冇將跑法未至於超錯、但又真係幾錯嗰批馬列出，如果唔係，仲多唔同嘅馬名及字眼出現。吖，開季唔夠兩個月，近排已經興起呢樣嘢，咁攪法，唔會係馬迷們想見到嘅現象，希望踏入11月會興番啲正面嘢。