啡格聰明錢連場得手

魑魅魍魉

近排啲聰明錢認真犀利，繼上個禮拜日「愛跑得」閘前瘋狂落飛近三百萬大注得手後，尋日又再出現類似鏡頭，主角就係第五場何廐馬「連戰連勝」及第六場苗廐馬「雄心威龍」。
       

何廐「連戰連勝」尋日繼續跑谷中千二米，仲要從12檔起步，點計個形勢都唔係好，最初隻馬都有廿倍。但係去到閘前，似乎又有啲大戶睇中「連戰連勝」，卒之呢隻馬嘅獨贏由16倍落至4.3倍着啡格，就算涉及呢隻馬嘅Q都全線着格，結果飛到馬到，「連戰連勝」一放到底輕勝二乘許，在場馬迷無人不嘩然。由於何良飛咗去澳洲準備「好先生」跑墨爾本盃，尋日冇入場，但呢隻馬總算幫佢打破個半月冇馬贏嘅悶局。