高清睇跑馬：精算攻略上仗受困

博彩老头

　　「精算攻略」上季三勝三位相當醒神， 拉士兩戰卻有飛冇影，睇番之前連番硬仗，又跑到五月中便唞暑，擺明狀態回落體力不繼，落敗根本不可作準。

　　今季初操練未算積極，快跳唔多，亦沒試大閘，實行寓操於賽，首戰1400米路短輸四馬位，接住谷草1650米落敗距離縮窄至兩馬位，到了上仗總場次138谷草三班1800米，落飛出擊跑第二，只輸畀「頭盤」個多馬位。

　　睇番整個過程，採取留前鬥後，不是「頭盤」率先發力，「精算攻略」走內檔，去到最後二百才望空，誰勝誰負仲係未知之數，何況之前從未跑過1800米，該戰初跑即有好表現，難度極高，同時亦證明現時跑長途最好，周三再爭同程，大好補中機會又豈會保留。

高飛飛小休會好

　　「高飛飛」上季落到四班後表現進步，首戰谷中1200米後追接近且仄準，接住轉戰田草1000米，只不敵「精靈勇駿」一馬位跑入第二名，到了季尾一戰，跑番同程谷草1200米順利開齋，最吸引是排在外檔，大半程走三叠，一樣後上照贏，不過佳績始終在四班取得，今季升班冇人睇好，結果繼續有好表現力拼入Q，睇番頭馬「勁有盈」再出上名，「一路奇兵」之後亦入位，可見賽事水準好高，上仗熱倒的確失望，但該役沿途搶口頭岳岳，人馬全程鬥力，用盡力氣自然衝刺欠勁，再看拼後小休個多月至跑，休戰期間又做足備戰工夫，已有決心補中，再次吼準谷草1200米贏馬路程，絕對值得追多次。

Sam