楝悉先機：龍騰寶駒長途掂

魑魅魍魉

　　一直以來，阿棟係比較有原則嘅人，一就一，二就二。難聽啲可以話硬頸、固執啦！初期都唔係好信谷草B欄一味內檔會好，但期期如是，季季都係咁嘅時候，條頸硬過把刀又如何，都冇咁多銀両堅持自己嘅原則，所以，呢幾季一見親B欄，通常只揀內檔馬，今期當然唔會例外。

　　第一場五班2200米。「龍騰寶駒」以自購馬身分來港，低極當時都69分，上季到目前只係跑咗12場，分數減咗一半有多，原因唔係質素低得可憐，因為本身係長途材料又慢熱，冇番一年半載適應期，幾難可以重現實力。而上賽終在1650米上名，證明漸入佳境，為配合進度即大幅加程，應更有把握，因外地贏到2000米，是場應是開齋黃金機會。

　　第六場三班1650米。「好兄弟」1800米上名率奇低，剛賽入位真係意料之外，變相證明牠目前具備良好狀態。由長途縮回1650米，路程性能強得多，雖然，同場「鵬力洋洋」並不易對付，查實「好兄弟」在三班也甚有分量，如果今場步速合適，好有可能以強橫後勁制敵。

　　第八場三班1650米。「蓋世子牙」初出直路賽完全不會放在眼內，但上場跑1200米已經小注開始跟，因為覺得佢有班，結果路短就係路短，喺內欄點留放得好都冇用。今場循正途回到1650米，練馬師已有出擊舉動，3檔唔難守有利位置，有機會補番我上次條數。

點買法

　　B欄唔買內檔馬，真係對唔住自己，問題只係揀邊幾場嚟買。頭場「龍騰寶駒」可以揸膽，遲熟馬一旦向好，唔會收收埋埋。配腳範圍亦唔覺好闊，拖１、３ 、４ 、９ 、１０ 。另外，尾場補條單棍，「睡得好」太準，「蓋世子牙」漸好，正Q 位置Q買晒。

陳華棟