馬主論戰

魑魅魍魉

張敬山：用番柏寶易搏贏

　　賀賢今季5場頭馬之中，有4場由柏寶經手，簡直有如影子主帥。

　　今晚第七場賀賢出兩駒，我就睇好柏寶坐騎「易搏贏」，上場配勞愛德跑一哩，表現其實都唔曳，只係以頭位輸畀「卓爾非凡」，今次用番馬房好拍檔柏寶操刀，應該可以贏番一場。

　　另外要吼第四場「百利旺」，季內三戰獲亞季殿各一，9歲馬唔會有保留，實搏到贏為止。

任達華：闊袍大袖唔驚外檔

　　葉楚航今晚手馬好惡，我睇好佢有馬贏，先吼實尾場「闊袍大袖」，上場初跑谷草1650米即刻贏馬，擺明窄場性能一流，而且蹄下敗將「靚到爆」再出即刻贏馬補中，證明賽事水準好高，今次排大外檔起步一樣冇有怕，有權再贏。另外鍾意第七場「勝任有餘」，上場所見落腳慢咗，結果姍姍來遲，今次增程跑1800 米係對症下藥，要吼。

寇鴻萍、梁廷鏘：喜勝威試準晒

　　谷草賽事，吼住方廐馬都唔會錯，今晚呢個馬房又有多匹惡馬上陣，要贏馬應非難事。
　　
　　先推介第三場「喜勝威」，上場初戴眼罩上陣，結果響嫌短嘅谷草1200米都追得勁，今次跑番一哩啱晒波
路，係時候贏馬交代。

　　另外鍾意第二場「駕世仔」，上場初出輕描淡寫都響田草1200米跑第四，質素一定唔簡單，今次轉場而戰可以出頭。