馬主論戰

魑魅魍魉

天外之天見真章

　　我哋隻「電訊超星」今日有份上陣，呢隻馬上場跑得唔錯，希望今次表現再進一步喇 ！ 講番心水，鍾意第三場「天外之天」，前仗響1400米贏得好精采，上場輸在氣管有痰，今次用何澤堯減磅上陣，增程跑1600米，可見真章。另外推介第五場「心歡笑」，上場響泥地1200米贏得輕鬆，上班跑同程排一檔話唔定可再贏。

張敬山

皇龍戰駒進步大

　　雖然李易達馬房今日只出四駒，但當中都有實力馬，我睇好佢有馬贏。先吼實第八場「皇龍戰駒」，上場失驚無神放入一席第四，只係輸畀頭馬「雨電風雷」半個馬位，三歲馬演出大有進步，今次再跑同程，應該係時候出頭。另外鍾意尾場「名人」，忠心馬一味死纏爛打，若然一早放出嚟，其他馬要終點前過佢都唔容易，一定要吼實。

寇鴻萍、梁廷鏘

極品絲綢諗得過

　　今日重頭戲馬會盃，大摩出三駒肯定會成為焦點，但其實方廐「極品絲綢」都唔可以睇小，一來方嘉柏今季好有捧盃運，二來呢隻馬上場已經開始近番，今次跑番2000米啱數，換個騎得之人潘頓上去，唔似係陪跑，有分頭諗得過。另外推介頭場「百威紀錄」，季內兩戰全入Q，評24分真係好着數，一定搏盡。

任達華