借題發揮：谷賽堪稱神箭手 柏寶競駿夠辣

港陌

　　柏寶停賽期間，韋達兩度贏孖寶，目前頭馬數字已超越前者，23對22W。講到今期二人坐騎，初期覺得韋達啲馬惡啲，但諗深一層，又好似唔係，阿寶有機會食胡嘅馬，可能比前者較多，尤其當「可愛人生」退出埋。

　　表面上，韋達現時在谷草贏馬數目比阿寶多出兩場，但如果計勝出率及上名率，阿寶反而係第一名，上名率更高達44％，屬各騎師之冠，所以，佢今晚喺主場出擊，點可以唔睇高啲。

　　頭場「神箭金剛」，五班谷草中長途乃一線分子，而近季配阿寶經常有佳作，理論上，一見到呢個配搭，已經等同出擊。此外，呢隻馬向來後勁強，等都等A欄先出賽，唔怕冇得追。

　　「辣得喜」上場贏得險，谷草又未好過，其實條件唔多好，但今場對手比上場仲水皮，帶住贏田草賽績嚟跑，點都賺級數。至於「駔驍駿駒」，今季冇成長冇變樣，在三班最多係中堅，好在跑速度嘅佢排內檔，易掌握形勢，放得順或守到靚位，有機會打開勝門。　

Jack