借題發揮：高雅志大師喜孖

港陌

　　高雅志第1日返嚟客串，筆者已指出佢會有接風馬， 只係估唔到「火箭人」與「魔幻大師」雙雙贏晒。唔係講得誇張，其實兩場勝利嘅功勞盡歸佢所有，真係騎少步，或者唔夠硬朗，莫講話攞唔攞到1場頭馬，換轉第二個騎，兩場都好大可能屈居人後。

　　如果用志叔同蔡明紹嚟比較，真係唔公平，但馬場係英雄地，冇話係fair game，你贏唔到，人哋贏得，點都會惹評論。而馬迷鍾意咁去睇，亦無可厚非，真金白銀信你，1場唔贏，第2場又唔贏，偏偏換人就鬥贏，冇理由咁多行運醫生啩？呢期東高合作馬唔多，依然係蔡仔擔大旗，此廐9駒之中，志叔只係分到3隻，唔去計季內初出而周身傷嘅「萬事歡」，機會馬係得一對啱啱跑得好嘅「魔幻大師」及「喜蓮智星」。

　　「魔幻大師」再遇「競駿寶寶」，條數大家識計， 讓磅由2 磅變5 磅， 後駒１１ 檔內移至１檔，有晒反先本錢，但要知道，兩駒皆為後生仔，你進步時我進步，係咪咁簡單一加一等於二，抑或好似之前「甜將」和「勁飛寶」，再遇都係做阿二，唔鍊過點知，信志叔拼勁，追多場。

　　「喜蓮智星」上場轉回1400米差啲贏得，未必全因換人所致，好大程度係此匹PP終於適應環境。既然搵到出路，又用啱人，繼續跑此程，而呢件綵衣又好鬥志，一定想贏番場。

Jack