高清睇跑馬：萬子千紅四班着數

港陌

　　「偉龍」上季演出頗為神經刀，未贏馬之前大敗冇影，贏完之後亦冇場好睇。今季雖然尚未贏馬，但頭兩場打叠上名，前仗亦跑第五，表現已較以往準繩，可見幕後花了不少心機訓練。

偉龍谷戰較合

　　上仗總場次206，「偉龍」出爭田草1400米，成熱倒灶的確令人失望，但該戰未能放出之餘，第二段時間更快至21.59秒，前置的「偉龍」落敗也可以理解。睇番此駒季內成績最好一仗，是在總場次51於谷草一哩跑第二，而唯一頭馬亦是在谷草1200米取得，反映谷戰最有把握，今次回師窄場部署見誠意，值得追多一次。

　　「萬子千紅」拍賣馬身價好高，但頭兩季除了首戰上名外，其餘各仗走勢冇次好睇。正以為可能入錯貨之際，今季此駒卻大放異采，首戰初跑五班表現欠奉，但再出即在田草1800米順利開齋，以兩個多身位彈甩亞軍「恒運財星」。

　　翌仗「萬子千紅」重返四班上陣，結果繼續以輕鬆姿態取勝，證明尚有大量評分在手。前仗此駒雖然於田草1800米落敗，但頭馬「智多飛」再出再贏，可見只是屈於強手。到總場次196，「萬子千紅」出爭谷草2200米，該役牠排二檔起步，出閘後大半程守第八位，去到最後八百米，韋達察覺到步速偏慢，決定中段踩油，直路上雖一度受到「天鷹」挑戰，但最終仍力壓對手取勝，表現出色。季內贏了三W之後，今番此駒仍可跑四班賽，可謂着數之極，坐位望贏。

Sam