洪禮賢講馬：「啡色力量」與擦牙洗面

港陌

　　天氣寒冷，日前夜馬預咗爆，尤其谷草C欄，檔位抽獎味道濃郁，加上嗰晚又有雨，基本上，未開跑之前，燶味四起，唔爆就奇，但估唔到8場大熱冇隻Ｗ到，部分連P都冇！唔係事後孔明，但遇到呢類場合，唔勒住荷包，都要酌量減注，始終一季流流長，有心水嘅日子多的是，明知燶味滿溢之夜，總要「樁」個頭埋去，唔化算囉。

　　啱啱嗰期賽事，「啡色力量」比比皆是，好多場合佢哋都留下唔少腳毛，冇刻意記低晒有咩馬被「啡」，但記得至少有幾駒係臨尾狂落飛，「好辣椒」、「御將軍」、「再來風」等等，3駒拉士皆見W、Q、P、PQ賠率勁瀉，雖然當中有得有失，假設「啡色力量」喺嗰3場都有參與，一樣大有水位，就以第四場「好辣椒」為例，輸W中P，而正Q搭「卡加小子」攪掂，位置Q仲收晒兩瓣，咁嘅賽果，對「啡色力量」嘅人士嚟講，近乎完美咁滯。所以，有時不得不佩服佢哋，經常專攻大眾盲點，以及遠離人群嘅熱門，年復年，可以眼光準、夠冷靜又注碼控制得宜，呢種具規律性嘅行徑，莫講話放諸賽馬玩意之上，剩係叫大家早晚擦牙洗面，同埋叫人早晨，或許未必做得足啦。

　　初步睇過周日賽事，第二場四班1200米，「新希望」上場第三名有啲勉強，但終歸係初出；復課準備冇停，鍾意佢喺周一拍跳表現，入到直路一拉出即有反應飆過廐侶，銳利走勢仲持續到過咗終點，呢次加程再戰，應可出頭。