楝悉先機：新力勁賺步速

猪拉多纳

　　大節前開戰，阿棟謹祝大家順利搵到火雞馬，開開心心迎接2011年！而睇過今晚形勢，其實幾散落，冇話邊一路人馬兵力特別強，所以，度馬時唔好側重某一兩個騎師，或者練馬師。而筆者則喜歡韋達與白德民，佢哋胯下部分馬熱門命走唔甩，好在感覺夠穩陣。

　　第三場四班1200米。「芙蓉威龍」季初贏完之後，連續幾場都係跑二至四名，但唔見得係實力問題，反之，關鍵所在係檔位，遠嘅唔使講，近仗顯然係受劣檔影響，令取位及處境不利，最終仍所負不遠，證明目前分數未到止境。這次終於排到內檔，而對手級數不加反減，取勝機會甚大。

　　第七場三班1650米。「蓋世子牙」上仗轉到1800米一試，跑落冇想像中咁好，所以，上場直路有冇畀人撞都好，末段其實唔係好有勁勢，今次練馬師在部署上即刻修正，縮回一哩，擺明仍有攻擊意圖。

　　「蓋世子牙」今仗一檔起步，跑C+3欄會賺到盡，有望繼前仗後，再贏同程。

同場多快馬

　　第八場一班1200米跑馬地錦標。「新力勁」不等1月1日一班1400米華商會盃，無端端走嚟谷草，還要縮程，部署上與近季唔同，係咪大摩認為隻馬級數夠殺，所以唔介意跑短200米，呢點則跑過至知，但有樣嘢好肯定，馬房班手足透露，此馬近況弗到爆炸。此外，因今場太多對手會前領，前中段步速唔會慢，此駒後勁咁強，可能會受惠，十幾倍W，點解唔博一博！

點買法

　　正如開場白所講， 今晚喜歡白韋二人坐騎，熱門有「芙蓉威龍」， 冷門有「新力勁」，呢條2 x 3W，中咗都過到一個快樂聖誕！至於心水連贏場次，鎖定第三及八場，1場比較正路嘅熱門， 另1 場則有分頭。總之，希望大家贏馬迎聖誕，真真正正普天同慶！

陳華棟