借題發揮：2011年首次谷戰 巫斯義最佳揀選

港陌

　　2011年嘅首次賽事，白德民嘅壯舉，令到好多好多馬友「遍體鱗傷」， 全日喺佢手中，有5隻大熱門叮叮，大家點好彩都好，避得1隻，避唔到第2隻，「擦損」在所難免。如果隻隻都有份，咁只可以認命，怪唔晒騎嗰個，人哋下體痛都肯繼續騎，幾有體育精神！

　　經過1月1日，呢個大熱門差唔多死晒嘅賽馬日，可能外界會愈來愈鍾意韋達，咩叫做平平穩穩，佢咪做得到，當日大熱W全靠佢一隻「好得意」撐住（「搏得分」唔算），而連贏幾期騎師王事小，起碼唔好失驚無神捧蛋，單日贏三場兩場，或者一場都好啦！至少有得中吓。但如果1日整幾隻蛋出嚟，馬迷邊有時間適應，仲要喺大日子，呢類新的一頁，真係唔揭開好過揭！

　　新年首次跑谷草，攬住邊位騎師做扶手棍？巫斯義係唔錯選擇，實力坐騎有三幾匹，又唔慌熱得過分，所以，在下一於捧佢場，買條W過關，希望還魂，彌補上周末創傷。

金堡龍華一哩試準

　　頭場「揀得準」及第七場「金堡龍華」，呢一對馬，近績唔算好吸引，不過，講到上場走勢，真係幾有跟進價值；前駒元旦日轉馬房初出，田草明明係盲門，仲要全程在外叠嘥腳程，最尾輸唔到5個身位，賽績已覺唔錯，匆出返谷草，場地啱，馬重輕番亦係好事，料有突破。

　　「金堡龍華」剛在一班1650米輸得接近，呢場降班、轉人、檔好，有晒提升名次嘅因素。

Jack