洪禮賢講馬：海力童 半冷值博

港陌

　　第六場三班1200米。對於「六六精英」上場發揮，睇完之後O咀，當時覺得直路上嘅際遇以及處理手法，好有季內「同一世界」贏之前嗰場嘅影子，唯一唔同之處，在於後駒跑完嗰場，賽後報告有大堆文字，前駒只係話受困直至最後200米啫。

　　如果「六六精英」冇受困，亦唔覺會有機會贏得到，但直路唔係衝到窒吓窒吓，名次可能會高啲，所負距離又會少啲。今場由田轉谷，對手唔同晒，就算佢係冇乜分揸手，評分在8字頭以下，未至於全無反抗力，尤其轉場所賺到嘅對手實力跌幅「差價」；賽前落草地試番課，對上兩仗冇咁安排過，意味着會郁手？唔敢寫包單，但本身一直喼到唔錯狀態，冇理由長期會翹埋雙手啩！？

　　第七場三班1650米。「海力童」近兩仗唔跑谷草，硬係要去田草，明明嗰兩仗賽期前後，都有此程畀佢揀，練者都冇選擇到，究竟係讓路性質，定係隻馬未跑夠，寧願累積夠跑頭先至返主項，總之，終於行番呢一步，點睇都係正面；上場田草1600米，拉士喺內欄楔上嚟追得唔錯，其實應睇好今戰嘅佢。唉，只可惜，隻馬已經唔係評分着數，騎練合作又未好過，郭能同程又未識上名，加加埋埋呢3樣因素，點都打窒信心，半冷就博囉。