楝悉先機：萬里駒磅輕檔靚

猪拉多纳

　　一打開個排位表，有兩個馬房深得我心，此為方嘉柏及葉楚航，兩個馬房上陣馬甚多，尤其前者。講到頭馬希望，好幾場皆可叫胡，是晚重心非此即彼。當然，在谷草C欄角逐，不由我們硬頸，檔好之馬，點都係要秤先，不過，近期此條賽道卻利於後上馬，一味前領則未必有着數。

點買法

　　由於幾鍾意方葉兩廐，第四及八場，攞嚟做2 x 3場重心Q 次， 希望順利過關， 預早攞到新年利是。獨贏方面， 由於今期推介之馬，原來匹匹均為未曾贏過，或者係難贏之馬，與其夾硬用嚟買獨贏過關，倒不如穩陣啲，買條3 x 1位置，難度唔使咁高。

　　第二場四班1200米。「日月暉華」長期在四班跑二至五名，多多少少在此班有分量，可惜此駒跑法被動，今季又經常抽到外檔，跑了9場，其中7場排9檔或以外，成績才會時好時劣，正如上場，唔係外檔令早段焗縮，轉直路彎又抄出大外叠，以當時追勁，至少有一席位置。今趟5檔起步，而阿勞再騎，發揮上應唔同，預期威力將更強大。

十足十贏晒體力

　　第四場四班1800米。「十足十」12月才首次出賽，至此才是今季第3場賽事，真係贏晒體力，所以，上場搏完都唔使擔心會散晒。由於上場有姍姍來遲之感，方仔安排此駒加程好合理， 此匹兩季未出頭之馬，必定把握機會，趁目前有態有力，拼盡求勝。

　　第八場二班1200米。「萬里駒」失運到不得了，連續3場谷草1200米，都係屈居第二名，用大師傅或小將一樣逃不過二奶命。今場升上二班跑，對手的確比前強， 要知道， 此馬突然少負18磅， 還有C 欄一檔之利， 論條件唔錯，WP玩得過。


陳華棟
資深評馬人