洪禮賢講馬：揀8號馬有盈有利

魑魅魍魉

　　今日係大年初一，兔年首日，祝願讀者有一個好開始，事事順境，一家人齊齊整整。做生意嘅，貨如輪轉；求學階段嘅，科科攞A；情侶就相相對對，如漆似膠；夫婦就和諧共處，永冇拗撬，總之一切心想事成！

　　洪某係70後，但一樣比較守舊，大時大節，好講意頭。亦可能兒時家訓嚴，自少養（打）成習慣，一到新正頭，有冇利是都好，一定會好好口（如果唔係當時實畀人開年）。中國人嘛，禮多人不怪，只要唔係over晒，大日子冇人唔鍾意聽祝福語。

　　發、發、發！喺呢幾日點會冇市場，開口埋口，祝人新春發財，斷估收唔到利是，都唔會收大信封啩！？講開「發」字，諧音8，唔查過都唔係好記得，原來近幾年嘅初三賽事，8號馬成績唔錯，今年會唔會係咁跑8、8、8，到時先有答案，但歷史好似畀晒貼士嘞。

　　08年嗰11場賀年賽事，中間場次試過連贏4匹8號馬， 順序為「勝眼光」、「極奇妙」、「星際雄師」及「鼓浪晨曦」，而全日埋單計數，8號馬取得5冠2亞3季，係得隻「兄弟齊心」冇P。而對上兩年亦有8號嘅「招財名駒」與「至勇威龍」勝出（上年共有6匹8號馬入前四名）。

　　因緣際會，定係有咁啱得咁翹？冇乜所謂，當係故仔睇又得，不過，今期8號馬之中，有「得力助手」、「有盈有利」、「飛闖」等，一批近績唔贏都有P嘅馬撐住，應該未會在今年斷纜啩！？