洪禮賢講馬：真的假不了 唔使紮紮跳

港陌

　　真真假假，假假真真，有時唔到我哋谷氣，老土啲講，真的假不了嘛 ！ 虛則實之，實則虛之，好似玩馬咁，估嗰匹馬係呢場搏命，點知原來自己「越位」在先，下場至係出擊目標，結果有份輸，贏嘅時候唔關自己事。我諗，呢類「悲天憫人」劇情，唔會咁不幸剩係發生響我身上啩！？

　　又例如，1場賽事之中，要估馬房主力，明明A駒由主帥騎，嗰場又係重要盃賽，而隻馬近績又好，級數亦夠，自以為甲練馬師畫公仔畫出五臟六腑，仲唔係A駒行先，但賽果出嚟，即一記耳光，B駒先過終點，睇完賽果仍然唔信，反問自己點解B駒賽前點秤都係削啲，偏偏會係馬房主力，但最終諗到半夜一樣晒頭。

　　經過諗錯隔離之後，學精咗，同日有第2項盃賽，呢次仲唔睇死嗰個練馬師，玩掩眼法博好分，又想底出！自圓其說到開閘，可惜去到終點，主帥嗰匹第一名，其餘同場廐侶統統只係花瓶角色，連P都冇。唉，諗多咗，又上咗寶貴一課，用神永遠捉錯。

　　好快又過咗1個禮拜，呢期賽事，甲練馬師連場有多駒拍住上，主帥騎嗰啲係咪主力 ？呢條題目不停腦內轉，搏命咁權衡輕重，A駒路程好、B駒狀態勇、C駒近績靚，總之刨馬刨到好似做問卷，不斷ABC。經歷了內心不斷鬥爭，最後決定唔賭，但睇吓又1隻，睇吓再1隻，甲練馬師畀主帥騎嗰啲，係咁排隊贏，嗰刻至知今日主帥係真身。呢類情境，大摩同白德民久唔久會領銜主演畀我哋睇，好似日前，「火龍駒」捧盃、「甜將」比「皇帝旨令」名次好，部署幾咁「坦蕩蕩」！

洪禮賢　馬會賽馬節目主持