借題發揮：大摩三雄爭金盃 魔法幻影近績最堅

魑魅魍魉

　　盃王！盃王！由上季嗌到嚟今季，大摩的確當之無愧！數番轉頭，佢由上季至今攞過嘅盃賽，真係水蛇春咁長，列個表出嚟，可能有成尺厚。淨係睇佢今季喺級際賽成績，可謂魅力沒法擋，因為今季18項級際賽之中，大摩取得5冠7亞3季，好似啱啱至有「火龍駒」捧走百年紀念銀瓶。而今日跑香港金盃，呢項一級賽，大摩又點會懶懶閒。

　　一睇往績，一連3屆金盃頭馬，都係大摩＋白德民，真係唔可以唔信命，而呢屆大摩有3匹馬出，「魔法幻影」、「爆冷」、「火龍駒」，件件硬嘢，講真，邊匹馬捧盃，其實都係實至名歸，冇話係咪底出。如果睇配搭，主帥騎「魔法幻影」，係咪主力所在？如果以今季模式，恕阿Jack滑頭啲講，主帥效應，一時係，一時唔係，嚟到今場又3駒出戰，希望到時大家唔會捉錯路。實話實說，「魔法幻影」前仗國際賽輸畀「飛雪仙蹤」，頭馬級數勁到無倫，橫掃幾個國G1，前駒呢次跑本地賽，平磅喎，邊有得鬥！

　　當然，「爆冷」亦唔係流，兩屆金盃盟主，點只係爛船，如果話佢9歲係老，其實4仗前才捧走女皇盃，級數唔會比前駒輸蝕，只要今場唔似得上次受困咁冇運，有得跑吓。而「火龍駒」畀我哋嘅感覺係低啲，上場只贏G3，上到呢類層次，可能唔夠撼，但佢上場捧盃過程好輕鬆，唔排除依家至開始大進，總之，贏開嘅馬，可以無限憧憬。　

Jack