楝悉先機：精彩生輝做膽有哩

魑魅魍魉

　　咪以為谷草C+3欄賽道窄，一定利前領馬，原來對上兩期普遍由後追馬勝出，仲要好多都係中外檔馬，模式有啲反常，唔知今次又會點？不過，以馬論馬，有時馬匹實力才是成敗的主因，如果檔好馬衰，一樣冇法子。某程度上，數據參考吓無妨，千祈唔好沉迷。

　　第一場四班1000米。「龍船快」前仗因氣管有血至冇表現，之前同之後嗰場都上名，實力冇理由喺四班冇運行。對於佢上場谷草演出，的確討到我歡心，因初出見佢仍然新嫩，但上場就算在細場，跑姿冇咩大挑剔，反映短期內進步幾大。呢場繼續抽到好檔，對手又唔係叻，有望贏番場。

閃耀小子唔驚外檔

　　第二場四班1200米。「閃耀小子」上場僅僅熟，跑長少少可能已經畀「日月暉華」過埋，贏得咁險，唔值得恭喜，事關以為佢好好質素，上場一有飛預期可大勝返嚟，點知贏短頭咋！不過，阿棟睇過佢當時走勢，早段因搶位用力多咗，可能係尾段冇衝得咁勁嘅主因。所以，如認定佢係超級貨色，今場11檔有咩好驚，一於再捧。

　　第八場二班1650米。雖然阿棟好少留意數據，因為鍾意「精彩生輝」，就望一望蔡廐與卓利合作成績，嘩，唔睇猶自可，原來○比八，冇1隻有前五名𠻹！真係打個凸。不過，隻馬一哩會好過1200米，又經常可打叠上名，負磅輕亦幫到手，而隔夜W賠率曾超過10倍，唔博等幾時呀！

點買法

　　呢期獨贏過關揀第一及第八場，希望中晒有頭有尾，但問心講，「龍船快」係穩陣但較熱，「精彩生輝」夠冷，不過數據唔「老利」。至於重心Q，頭場好似易拆局多啲，６ 膽就梗，配腳喺２、３ 、７ 、８、９之中選擇。

資深評馬人　陳華棟