借題發揮：停賽前數胡快過坐神八 蔡明紹氣勢盛

魑魅魍魉

　　跑完今期賽事，蔡明紹便會進入漫長停賽期，停足9日，要到4月先至再見到佢。佢之所以被重罰，大家都知咩事，阿Jack唔使再多花篇幅去講解，不過，佢係咪只得「威力高」跑錯，我覺得唔係，如果初犯者，之前完全冇問題，點會重手9日咁多！雖然佢崇尚順其自然跑法，呢套理念啱唔啱？其實係睇吓套在邊個身上，當年佢師父Anthony，陣上處理亦喜歡自自然然，又唔見會成日引起迴響。

　　順其自然，唔等於冇分寸，前領馬要放頭走，亦唔一定要拼死咁搶出。其實如果喺舊年代嘅賽馬世界，今次事件，佢可能已大步檻過，1日都唔使罰，但現今賽馬世界，已經唔再係咁，有晒透明度，監管制度健全，犯事者，唔容易逍遙法外，尤其屢次出錯，更加難走甩。希望蔡明紹，經過呢次長假期， 喺賽事中有所進步，唔好再停留於新嫩階段，如果唔係，的確枉費跟個咁好嘅師父。好話唔好聽，要佢學足師父十成功力，怕且學識都老，但有得7、8成真傳，莫講要爭取成績，挑戰韋達嘅領導地位，亦唔係天方夜譚。

　　其實蔡仔近期係咁贏馬，啱啱仲贏埋G1，開創個人歷史，臨停賽前的確氣勢盛，係有心造就又好，知恥近乎勇都好，總之嚟到暫別一戰，梗係有得贏就好贏啦！講到佢嘅機會馬，「龍船快」、「神州八號」及「快人快語」，3駒冇好賠率，好在有級數，贏晒都唔奇。

Jack