馬主論戰

港陌

清新空氣食尾胡

　　剛啱柏寶憑「旺當家」同「家樂飛」起孖， 搏殺手風大順，我睇好佢今晚繼續有馬贏。

　　鍾意尾場「清新空氣」， 上場大半程走外叠，返嚟都追入第三，表現唔簡單，換柏寶操刀擺明係搏殺格，要吼實。

　　另外推介第五場「好笑容」， 近三場跑谷草1200米，全部輸唔夠兩個馬位， 已經試到準晒，今次排三檔起步，應該都係時候贏番一場。

張敬山

胡森有應變計劃

　　頭場係條件限制賽， 通常呢類賽事， 大熱門都未必贏得出，不妨向一啲冷馬埋手。推介胡廐馬「應變計劃」，今季場場名次都係雙位數，睇賽績絕對唔吸引，但亦反映出求減分心切，今次終於落到四班跑，面對一群弱旅，唔郁手等幾時？

　　另外尾場「龍得風雲」都要留意，上場響直路塞到飛起， 可以當佢冇跑過， 韋達唔放手應有見地，咪睇小。

任達華

紅跑車強配撻着

　　返到谷草，梗係要吼實方廐馬，第三場方嘉柏出一對，睇嚟志在必得，較啱心水係「紅跑車」，上場跑沙田都衝得勁，今次轉嚟谷草應該仲啱跑，用到柏寶一定鍊盡， 坐位望贏。另外推介尾場「滙名燈」，在港跑咗16場全部入前四名，演出真係準到冇人有，今場對手唔算強，有二檔幫手兼用何澤堯減磅，話唔定可以贏番一場，值得吼實。

寇鴻萍、梁廷鏘