借題發揮：團隊福星賽績堅 駿蹄飛撻番着 吳定強係時候發威

港陌

　　望一望練馬師榜，暫時剩低5個馬房未上到岸，當中攞得最多W係伍碧權，手上累積10場頭馬，好坦白，權哥成個馬房得廿鬆啲隻馬，已獲雙位數頭馬，對得住太公婆有餘！而睇佢廐內成員，要多添3場勝利，應該唔難，希望佢快快手搞得掂。

　　暫時喺尾二係吳定強，僅得6場頭馬，佢養馬量係前者1倍有多，贏馬次數卻只得伍廐約半數，成績固然係唔好，但呢種情況真係好少見，因為，吳廐對上十年八載，每季十幾廿場W冇走雞，通常未到季尾已經夠數，冇乜邊一季要苦戰到尾聲先至湊足數。阿Jack唔多清楚佢個馬房點解成績平平，亦冇索到馬房內部曾經出現過咩問題，唯一知道嘅係佢呢期出馬特別多，足足有7駒，比起近期通常一次出三幾駒，明顯有唔同態度。

　　叠馬，唔等於一定有馬贏，呢點在下好清楚，不過，今晚佢啲馬，整體唔係甩皮見骨，有好幾駒隔晚更唔係大冷門，獨羸喺10倍8倍咁上下，所以，咪當佢會繼續冚旗。

　　個人對「團隊福星」和「駿蹄飛」比較有好感，始終呢一對馬季內曾經喺今仗路程跑得好，而前駒五班點會冇優勢，贏得「大地神駒」，賽績堅到不得了；後駒乃1200米專家，上場可能係縮回此程第1仗，未必可立時跑番出十成水準，適應過後，今場或可發威。　

Jack