洪禮賢講馬：順其自然「外遊」 滿綵跑法唔妥善

猪拉多纳

　　周末跑馬，時不時會爆冷，部分跑出嚟嘅馬，賽前可能完全冇諗過，但啱啱嗰期算係冇乜點爆過，最冷獨贏不過係廿倍「奇葩」。而喺當日賽事，令人印象深刻嘅事，喺頭場已經出現。可能對於好多人嚟講，一千幾百萬係小數目，恕洪某冇見過世面，所以，先會嘩嘩聲，喺嗰場嘅「飛躍之駒」，臨開跑前短短兩分鐘，獨贏由 8倍幾打到唔夠3倍，涉款約450萬，嗰注落得既急又狠，但最終該駒因心律不正，包尾返嚟。

　　聰明錢唔係時時都咁聰明，冇人會預測到1匹馬幾時會心律不正，幾時會「爆缸」，幾時痰上頸。又好似「金德寶」咁，贏完賽後驗到氣管有血，如果一個唔好彩，佢當時氣管有血係達至3、4級的話，P都冇有乜咁奇。

　　當日值得回味之事仲有尾場「滿綵」嘅跑法，順其自然地「外遊」，居然跑到第五名，隻馬自身那顆自強不息嘅鬥心真係堅。唉，如果鞍上人稍為實淨少少，最低限度會跑個P。

　　雖然10檔起步唔係容易切入或搵遮擋，蔡明紹出閘之後亦望咗埋便好幾次，但望還望，佢愈望隻馬就愈外移，一路沿住四叠，蝕到去直路彎。

　　而喺直路大部分時間仲要韁繩鬆泡泡，「立」咗幾次仍然收緊唔到，基本上，人馬喺過咗最後100米，先至略為協調到。套用講波術語，「牛油手」累事，但奇就奇在，贏「福陞」及「延續美麗」嗰兩場，又冇見「立」得咁牛油，唔通「滿綵」係匹特別難跑嘅馬!?

馬會賽馬節目主持　洪禮賢