棟悉先機：飛魚駿王出盡法寶

港陌

　　今晚跑泥地夜賽，向來係大放冷氣嘅賽事，不過，上期又唔見得爆到好犀利，最冷W亦只得十餘倍，熱門馬仲贏咗好幾匹，希望今晚嘅賽果都唔會亂晒籠啦！但老實講，今期幾頭痛，驟眼望落排位表，用咗好多時間去刨，硬係覺得搵隻P都好似唔易。

　　第三場四班1200米。「飛魚駿王」今季上陣10次，有半數跑到入圍，但就未贏到，睇得出伍碧權好用心想交代，在路程、場地、騎師，以至配件等等，不斷作出唔同嘗試，希望搭啱條線。如根據呢匹馬季內表現，最準就係谷草及田泥1200米，所以，今場叠埋心水等番同一路程，點會冇鬥志，如重戴眼罩起到刺激作用，唔係冇機會破處女身。

　　第四場四班1650米。「金瑞」算係今晚阿棟比較喜歡嘅馬匹。冇錯，佢在港跑到依家都未贏過，唔會叻得去邊，睇唔到佢有潛質升到上三班或更高層次，都係中班材料。不過，上場初跑泥地一哩，可後上入Q，只係僅僅追唔到「成就美麗」，如果唔係兜大彎推進，當時唔係冇資格贏。今場出動柏寶，排埋3檔，條件更勝上賽，係時候開齋。

勁飛駿英國膠沙賽上名

　　第六場三班1200米。「勁飛駿」跑咗兩場，成績仗比仗理想，證明此駒在適應方面愈來愈好。轉到泥地一試，勝任與否？我唔知，你唔知，就算練馬師都係博博吓，但此駒曾在英國膠沙地1200米跑第二，而我亦覺得隻馬有幾多分喺手，所以，如果轉爭泥賽有好賠率，會博佢先。

點買法

　　正如開白場所講，諗馬諗到頭都痛，都係單純啲策劃算數，費事浪費子彈。一於捧第四場「金瑞」，注定係熱門，1W3P，希望穩中求勝。而連贏位都係揀埋同一場，·１２做馬膽拖３、６、８、１４，當中啲腳有冷有熱。

資深評馬人　陳華棟