洪禮賢講馬：傳奇快車玉峽生輝勁飛馳穿針引線 朝東精英富貴金龍好好彩風雲勇子

港陌

　　泥地夜賽向來有得追，而上期23/3如是，希望今期唔好轉勢。至於馬房方面，告東尼整體兵力最強，又可能繼上次全泥宴後，再次大舉出擊。

重心場次　第8場　第一班（105-80分）1200米

　　「朝東精英」剛勝爆段22.2秒拉士，係當晚最快，末段追勁太誇，就算跳班半，依然唔怕。再講，今場早段應該幾快，有利佢後追跑法。

　　「富貴金龍」當打，此程又有晒證明，乃前駒最大勁敵。「好好彩」路程專家有埋內檔之助，本應有唔錯機會，可惜遇到前兩駒，不易闖關。

　　「威威財星」短時間大幅縮程，唔係咁鍾意。「新力飛」上場入Q姿態唔討好，除非好好泥地，以及108磅好有幫助。「風雲勇子」近仗整體表現穩定，正路配腳。

第1場　第五班（40-0分）1800米

　　「綠駿群英」唔等之後贏馬路程，特登轉場地，雖則有風險，但上場贏來輕鬆，應該仲有分喺手。「兵奇臨」攤長路程會更啱性能，有可能因應配件及排檔而擺前啲，仲會好跑。

　　「煇煌駒」及「冰火」，始終係五班泥地前列常客，要重視。「乘風破浪」泥地1800米係死路程，唔會三心兩意。餘駒之中，以「博利好」最睇唔透，上場已有揀，耐冇出喺短途一樣跑得好，睇血統，此程不成問題。

第2場　第四班（60-40分）1200米

　　「上海先鋒」身處四班一定有着數，而泥地性能早於季初已證明過，轉場應有拼意。「金獅駿將」近況唔覺特別好，只係計分有利，因季初同程曾咬住「威威財星」返嚟。

　　「全德勝」工序唔多正常，但唞得耐偶有佳作，冷門可博呢匹分利馬。「樂融融」及「飲水思源」，都係排外檔，如計性能，後駒較佳。「哈哈妙」剛仗全程好位僅得季軍，表現略失望。

第3場　第四班（60-40分）1200米

　　「萬人迷」按此程演出穩定性及近況，做膽應該稱職，只係弊在馬房運勢。「夢幻魔術」唔計漏閘嗰場，其實場場喺前幾名返嚟，而本身夠噸位又跑法進取，轉到此程或可應付。

　　「勁快」上場縮程嘅效果唔算好出色。「飛魚駿王」難贏卻經常喺此程有成績交出。「乘奔御風」博加罩及1檔賺盡，可能有得贏。「聚豪精英」冇咗好位，好大機會又要像上場蝕住衝，演出點都會打折。

第4場　第四班（65-40分）1650米

　　「金瑞」唔係跑到咁蝕，上場同程應贏，另一方面，初跑泥地可有此表現，性能真係幾好，希望內檔加柏寶，唔會帶來反效果。「成就美麗」上賽前工夫有阻窒，仍然贏得到，難度唔係勝後加嗰6分可代表到。

　　「事事順意」泥閘成日追得好，轉場一試唔係壞事。「威力高」如上場唔係偶一為之，加程肯定更有威力。「善戰」上場發揮唔係好，換人有磅減，值得再畀機會。

第5場　第三班（85-60分）1650米

　　「傳奇快車」評分差唔多到頂，最後一着轉到泥地，希望因應對手實力下降撈到油水。「玉峽生輝」跑低班半，交得出上場水準，喺度已夠贏有餘。

　　「穿針引線」純粹跑性能，排檔不利其實唔係冇影響。「勁飛馳」現時一哩會比短途好衝。「靚到爆」太細隻，轉到泥地未必夠體能應付。「好得意」唔係大外檔，其實應該拖埋，因近績太準。

第6場　第三班（80-60分）1200米

　　「江山如畫」之前同程際遇唔好之下仍輸近，表現出性能唔會差得去邊，如乘着2檔優勢，早段帶得順，或可放返。「飛快威」及「日日中」，一對熱門馬，唔係冇挑剔地方，只因位好而對手唔強。

　　「星運俊爵」要面對轉場和升班，壓力唔係冇。「獵豹小子」10檔起步，以佢嘅跑姿，唔易克服。「勁飛駿」排檔唔好，以佢嘅跑法未必夾。「如日方中」有唔少同父馬跑此程都掂，大冷可博。

第7場　第三班（80-60分）1200米

　　今場多馬早段放，「一定快」靠追，形勢會好，有埋2檔，如賺埋腳程，贏面更大。「明海光輝」及「太陽昇」，好位而跑法主動，亦有可能受惠賽事環境。「幸運雄獅」仍未教好，陣上經常難操控。「正白旗」按上場表現，插三班唔會失利；「綠衣郎」上場贏馬姿態驚險卻時間唔錯，一對馬可拖。「田園名駒」眼罩一招了，抑或升班問題，今場可有更深了解。

馬會賽馬節目主持　洪禮賢