洪禮賢講馬：多多昇清脆利落搖滾雄豐日月暉華 金獅威將曬冷王沙貝利卓爾非凡

魑魅魍魉

　　今日谷草B欄上演賽事，睇番對上1期偏差好大，當晚有7場連贏位，係由2至6檔馬包辦，去到尾場先至爆攤，睇吓呢期又係咪咁好路嘞。

重心場次　第7場　第三班（80-60分）1200米　

　　「紅旗勇將」試谷閘有前有後，全程流暢而貫注到底，留下幾好印象，睇嚟落地後，狀態一操即起，如果唔係睇得唔打得，初出已有權贏。

　　「紅封包」重返谷草，比田草叻得多，如喼到本身水準，三班好惡。「一定爆」首次加程，仲要排7檔，要視乎騎者如何演繹。

　　「至尊飛飛」公認上場係弱組頭馬，原本加磅後唔易再贏，但B欄1檔有可能賺盡。「最佳孖寶」排外檔，如又焗搶，收場或與上賽一樣。「大把在手」千辛萬苦贏番場，而呢場加分、轉場及外檔，唔易克服。「酒勝」漸有分利，冷門可諗諗。

第1場　第五班（40-10分）1650米

　　「康樂名駒」休出久唔久會跑得好，此程略嫌短都唔能夠睇小。「標青」與「超力駒」，級數最高，可惜排檔失利，條件唔完備。

　　「無敵鷹王」12檔冇大影響，前仗C欄11檔幾乎贏埋，證明有克服劣檔本領。「龍騰寶駒」唔易贏，卻有準繩一面，邊線腳。「創出傳奇」賽前工夫入肉，似有意思郁手。

第2場　第四班（60-40分）1200米

　　「幸運紀錄」及「御龍神駒」，擺明未熟，彼此仲有唔少問題要改善，但上場各有吸引走勢，質素喺此班夠用有餘。

　　「消費王」唔係慢閘，其實喺班內此程值中上實力。「聚有盈」以上場贏馬姿態及時間（比同晚四班快），升班未驚過。「風動寶」唔係12檔，應該要拖。「歡欣星」加眼罩會有一定幫助，係配搭問題，但如成大冷，呢注唔慳得。

第3場　第四班（60-40分）1200米

　　「多多昇」近仗不斷跑啲冇把握路程，無非想減分，既然前仗連田草1400米都有第四，降班返回主項，仲有1檔，膽材。

　　「清脆利落」之前兩仗所遇對手係唔錯實力指標，一再可上名，證明有班。「鄉村傳奇」及「金財子」，外檔削弱機會。「日月暉華」隔一隔安排跑短，做法正確。「搖滾雄豐」排好位，唔會留得太後，跑法仲啱啲。

第4場　第五班（40-10分）1650米

　　「喜相逢」之前兩試大閘，最近1次從容得多，做番夠工夫，進度嚟得好。「魅力影子」揀開，接連又跑得好，再拖。

　　「年年如意」仍對其狀態評級正面，神經刀1名，有賠率可博。「成功年代」以近仗曾輸近水準，喺五班一哩好惡。「兄弟班」路程略短。「當旺」此程太長。「贏啲啲」剛賽1200米也湧得吓，加程要小心。

第5場　第三班（80-60分）1000米

　　「紅衣叻叻」愈贏愈有格，有埋內檔更可順應形勢，再W。「金紫荊」路合檔好，還要唔使負重，條件唔錯。

　　「勁闖駒」9檔，如果唔夠快，隨時沿路三叠；「火燎腚」情況近似（仲曾缺課幾日）。「明達」剛賽跑法如自殺，大敗賽績不用理，還是依據前仗被塞仍輸近表現去計。「田園名駒」係咪真係唔夠班，今場有最後答案。

第6場　第四班（65-40分）1650米

　　「雪山神駒」和「新力多」跑低半班，對手再唔係「開心老友」，所遇阻力有限。

　　「精密紡」6檔有少少尷尬，早段如楔得好，仍會有三甲。「財運」均速馬轉到谷草，冇咁下風。「旺家多寶」又可能遇番前仗形勢，能與「漸信良駒」串Q，喺度目空一切。「駕世仔」12檔幾難跑，因為上場贏馬仍見唔規矩，一個唔好彩喺三叠，未必應付到。

第8場　第一班（105-80分）2200米

　　「利好」老來嬌，連續6場冇W有Q，銳成咁，點都要重視。「怡勝」返谷草，賺到整體對手實力「差價」。「威利旺旺」此程可能係最適合佢發揮。

　　「包裝選擇」大長途實啱，問題係初跑會點啫！？「精算攻略」和「活力奔騰」，評分漸到頂，不易再突破。「闊袍大袖」再加程，效果未必繼續好。「旺國手」路程最有根據，但人馬夾唔夾未知。

第9場　第一班（115-90分）1650米

　　「金獅威將」賽前有大閘，係搏殺象徵，一旦場地性能OK，重磅都夠贏。「曬冷王」級數不比前駒差，惟打吡過後，係咪可即時跑得好？

　　「沙貝利」係準，正路腳。「卓爾非凡」隔得耐，但總算趕得起進度。「戶外名駒」如跑好快地，直路隨時爆到上嚟。「皇帝旨令」卡士唔夠，磅輕亦未必會幫好多。

第10場　第三班（80-60分）1800米

　　「開心老友」與「喜蓮智星」又碰頭，讓磅後角色調轉，來回數超過十磅，或成反先條件，惟後駒唔係好鬥得係最大缺點。

　　「紅跑車」及「十足十」，一對方廐馬，近績當然係後駒討好。「我愛您」上賽直路取位唔順先會影響成績。

　　「可愛人生」銳勢可能已落咗。「風力威猛」徹底失望。「好旺財」3月時工序嚴重不足，進度應難趕番上。

馬會賽馬節目主持　洪禮賢