棟悉先機：勁勇士 磨利搏命

魑魅魍魉

　　但凡快活谷跑C欄或C+3欄，阿棟一定唔拗頸，揀馬方向必然集中喺前置和中置馬，唔係話唔想兼顧後上馬，1隻半隻都會諗吓，多就無謂，始終跑道模式係咁，背道而馳又有咩意思呢。

　　第一場四班1000米。上期已經貼「精靈勇駿」做正選，15倍獨贏「鏗鏗聲」，阿棟自己仲回味緊，再揀多次，當中梗有謝路寶成分，不過，睇佢上場由頭放到尾嘅過程，造出時間又快，真有半力言旋之感。將心比心，吳廐未上岸，贏開之馬冇理由會突然縮槓，一於追多場。

　　第二場五班1000米。「馬中神駒」上場係轉到薛達志馬房初出，諗住一出即刻搏，可惜遇上忽然神勇「友情友義」，問心嗰句，韋達全程已發揮得滴水不漏，沿途二叠咬好位入直路，仲要偷埋內欄推進，硬係追唔到頭馬，只可嘆句無奈。呢匹馬重返薛廐，立即有表現，好明顯倉主想攞威，如果近況唔省鏡，唔會畀隻馬出賽，今場應有好大信心補中。

　　第八場二班1200米。「勁勇士」今季跑了4場，唔好計跑到「烏厘單刀」要被問跑法嗰場，其餘3場冇W有Q，交得出咁嘅成績，隻馬評分應該未到盡頭。而上次係臨場換人，發揮唔講得上好，最多係僅僅稱職！今仗回配白德民，人馬合拍程度唔同。再睇埋賽前整多個大閘，睇嚟今場立心一撼擂台躉「文武維揚」。

點買法

　　由於跑道關係，買馬都係「走」嘅好，「精靈勇駿」及「勁勇士」正正係呢類馬，一於獨贏2 x 3，以頭尾場串射。至於連贏重心場次，尾場應該係正正路路，買呢1場就算嘞。

資深評馬人　陳華棟