馬主論戰

魑魅魍魉

文武維揚冇對手

　　柏寶剛啱中三元，仲贏埋在港第500W，都算威到盡，我睇好佢今晚繼續有馬贏。推介尾場「文武維揚」，呢隻馬谷草性能真係一流，同柏寶亦都好合拍，今次排埋三檔靚位，真係睇唔到有對手可威脅佢。另外鍾意第二場「馬中神駒」，上場回巢薛廐初出即刻有嘢睇，擺明唔會攤凍食，今次繼續交畀韋達操刀跑 1000米，排四檔起步唔曳，應該可以補中。

張敬山

私家路勝在忠心

　　方嘉柏剛戰出馬大堆頭，但結果只憑「聚有盈」取得一W，表現唔算太出色。不過，今晚繼續跑谷草，依然係佢主場，不妨繼續吼實方廐馬。推介第四場「私家路」，轉方廐後跑咗12場，其中11場有獎金收，真係準到冇人有，一於捧場。

　　另外第五場「心路」都要吼實，近四仗三度上名，直路例牌衝一段，今次排一檔起步，形勢更加有利，贏得。

任達華

精靈勇駿拔頭籌

　　今晚我哋隻「鐳射槍」有份上陣，呢隻馬上場轉告廐初出，跑谷草一哩輸唔遠，今次增程跑2200米應該更加啱腳法，希望可以有好表現喇！講番心水，鍾意頭場「精靈勇駿」，上場一放到底贏馬，睇姿態響四班真係有着數，今次再戰1000米，再贏冇難度。另外鍾意第二場「分享」，季初有本事撼「文武維揚」，如果交出水準，試問響五班點搵對手？

寇鴻萍、梁廷鏘