高清睇跑馬：新力飛1200米補中

魑魅魍魉

　　第四場三班1200米。「新力飛」第二個回合已贏馬開齋，接戰唔跑1200改攻1400米，可惜因為「奪寶」亂放，步速快得離譜，白德民早了發力之下，慘被後上的「黃金褭蹄」同「齊歡唱」偷雞得手，大熱門僅得季軍。前仗總場次501跑番1200米決心補中，但可能受縮程影響，早段跟唔上，最弊入直路一直被「田園名駒」頂住去路，欲在外檔衝又內閃難控制，最後終於走出外檔，怎知「田園名駒」又外閃，再次受阻，遲遲望空擺正盤軚衝刺，但後上勁如炮彈，相信沒有上述意外，又或不是當日場地不利後上，肯定能贏馬。上仗泥地不合而敗毋須介意，今次回師首本路程，可放心追捧。

　　第九場三班1600米。「天外之天」今季三W大放異彩，亦係伍廐唯一三捷馬，但近三仗田草1400米未能建功相當唔抵，先講總場次412，沿途留守黃金包廂位，本來一步不蝕形勢大好，卻冷不防多駒一齊衝刺，加上前面「心歡笑」乏力，因而前無去路從未望空，最後只能跑尾四。

　　「天外之天」於446場走二叠生位，但可能比之前留得較後，直路望空遲遲唔肯轉腳，過了一百米才換腳衝刺，追勁雖強但落後太多，只能跑第二。至於上仗482場，本已貼欄卻走出二叠，之後更畀「大有利」搞到嚴重勒避兼失地，跟住走出三叠蝕位，走位老襯唔輸至奇，獲殿軍已及格有餘。今次強配柏寶跑曾勝之1600米，可收復前失。

Sam