賠率有路捉：勇先生開飛有料到

魑魅魍魉

　　噚日晏晝，第一、五、六、九及十場的WP飛較為分散，有啲大熱W 仲有5 倍咁好分，另外第二同七場嘅大熱門雖然一面倒，但竟然分別係未開齋嘅「金莊」同「滿綵」，飛數分布同上次冠軍一哩賽日完全係兩回事，唔通未跑先有爆冷預兆？小心為妙。

　　如果要捉冷馬，大家不妨留意吓第四場「勇先生」，事關呢隻馬噚日墊底飛明顯比前勁，話說佢來港服役暫時上陣三次，次次都輸七個馬位以上，所以餐餐99倍好合理，但噚日一點鐘個W 竟然得9.1倍，對比番今季贏過馬，季內又未有一次輸多過六個馬位嘅「連利福星」都有62倍，明顯睇得出「勇先生」落三班真係有人撐。

　　呢隻馬表面上冇近績支持，仲孭住個133磅嘅書包，但只要細心留意佢喺愛爾蘭個績，就唔會再睇小佢。首先，佢兩歲嗰時曾經喺高運園同「飛銀動力」鍊過一轉1400米，雖然輸咗，但起碼有第二。之後又喺李奧柏馬場跑三級賽1400 米壓倒「清風送爽」得第二，後駒嚟到香港跑二班賽都有一席，「勇先生」落三班跑1200米點會冇着數，隔晚有飛不妨一吼。

騎師王三強鼎立

　　騎師王方面，今次係柏寶、韋達、白德民三強鼎立，但佢哋又冇邊個特別熨，咁嘅情況，大賽日應該揀番有大摩撐嗰個，就白德民啦。

周仲