洪禮賢講馬：和諧大使精密紡心路安瑪 漸信良駒福喜四季睡得好

港陌

　　谷草A欄賽事，點都冇其他賽道咁難搞，從大熱門上名率向來喼到幾高比率，便知道係咩一回事。講到今晚焦點，大抵又係方葉兩廐之夜。

重心場次　第4場　第四班（60-40分）1200米　

　　「聚有盈」多負10磅，對戰鬥力打折係正常諗法，但近兩勝所表現出嘅姿態，簡直係譁然！尤其上場以快時間輕勝，更覺堅掂（季內只得3匹四班頭馬，此程締造1.10.0以內），此馬銳得咁緊要，都係唔好諗多咗。

　　「日月暉華」唔係向來冇打叠，排內檔喺A欄跑，其實係班頂角色。「金財子」及「大旋風」，一對馬排晒外檔，真難搞，如以跑法而言，後駒有權克服到。「鑽飾彩虹」4月頭曾腳傷，但好快就復課，至於進度有冇影響則兩睇。

　　「生豪」轉馬房後着手做工夫，由於早已打好底，接手後唔難操好，轉倉初出已要重視。「飛躍之鋒」上場之敗，完全搵唔到藉口，可當偶一為之。「京城精英」眼罩唔覺有用，有冇睇錯，呢場可知。

第1場　第五班（40-0分）1800米

　　「綠駿群英」只要唔係跑泥地，田谷草地1800米在班內好有級數，尤其現時有「方」。「喜相逢」最近搏完唔瘦，應可保持水準。

　　「神箭金剛」有班，只係今季能力略退。「康樂名駒」此程比一哩好得多，12檔希望影響不大。「大唐勇將」連贏兩場一哩，近績最省鏡。「魅力影子」唔係11檔用蔡明紹，其實要拖。

第2場　第四班（60-40分）1650米

　　「星際雄師」兩仗前跑同程，係就係慳位喺內欄衝而得殿軍，但嗰場係三班賽，仲可以拍住「雪山神駒」壓線，留下唔錯印象，之後兩場唔同路程，跑成點唔會理，因可能係漸到降班分數才有咁嘅表現。今仗落班即跑此程，賽前又唔係hea，抵博。「新領袖」早已指出加程係必需，上一哩既有表現，再追。

　　「私家路」太短日子內縮程，必有影響，爭三至五名居多。「及時雨」及「大將風範」，今場或會受惠早段唔快嘅環境。「橫亨」12檔不易應付。

第3場　第四班（60-40分）1650米

　　「和諧大使」及「精密紡」均喜歡，前駒班利，並在賽前有晒唔同態度嘅安排，目標顯然在今場；後駒分數未必再有好大突破，準開卻是一大賣點。

　　「神勇馬車」1檔變12檔，咩優勢都冇晒。「心路」同程交得準（8場得1場冇獎金），正路配腳。「哈哈大少」和「再來旺財」，備戰上有甩漏，略為擔心。「安瑪」有可能1200米非主項，唔排除大幅加程反而啱性能。「康莊大道」剛輸近賽績，好難界定係咪貼欄關係，宜睇多場。「陽光普照」均速馬，轉到谷草仲好。

第5場　第三班（80-60分）1200米

　　「海之宏」及「輕輕鬆鬆」又同場，並排到中內檔，一對馬應可控制段速，不易被其他對手放頭，若跑到近仗水準，仍有三甲。

　　「夢仙」第2個大閘明顯比首試時順暢，最大改善係一對前腳運步時幅度，而佢落地後進度唔錯，初出應會跑得好。「銘記心頭」有點懷疑上場咁好位而幾乎連殿軍都冇嘅表現，係咪要加程，呢場會更了解。「紅旗勇將」上場地慢或不合，睇樣點會係三班馬。「浚鋒天河」夠膽去放，睇完上場啤一聲！但按目前分數實在太筍（比上季尾贏馬時仲要低兩分），防儲夠新鮮感搏今場。

第6場　第三班（80-60分）1000米

　　「金紫荊」就算重磅，少有在此程跑得唔好，除非畀外檔拖累，今仗5檔唔會有問題。「多益善」上賽前已講過，直路賽可能比谷草更合，所以，重返此程唔會有更大期望了。

　　「日日中」及「火燎腚」速度型兼有好位，先決條件好。「軍刀」唔係怕佢漏閘應要拖。「延續美麗」及「江山如畫」在中外檔有風險。

第7場　第三班（80-60分）1650米

　　「漸信良駒」總覺前仗贏馬係忽然勁咗，贏馬前後嘅能力值才最貼近真實，所以，過熱唔會捧W，有好檔關係，做膽尚可。「福喜」剛與前駒同到，應揀。

　　「四季」10檔唔知會點處理，估計會跟前，今仗早段未必快，或有利。「喜蓮智星」一換配搭即冇晒影，難免有聯想。「睡得好」分數「質」番低，回到此程有得揮。

第8場　第二班（100-80分）1650米

　　「易搏贏」1200米居然入Q，演出喜出望外，肯加程配合，兼用到柏寶，有晒手影。「快人快語」之前腳有事，但之後試大閘追得唔錯，唔覺有唔妥。

　　「清風送爽」及「秘密行動」係邊線分子。「火箭動力」唔落三班，好難爭取好成績。「驚喜」重返此程，恃輕磅有P望。

馬會賽馬節目主持　洪禮賢