棟悉先機：禮尚往來大把本錢

魑魅魍魉

　　天文台又話今日會有幾陣驟雨，好在唔係密密落，其實唔使驚，事關沙田賽道去水夠快，唔應該有甚麼大影響。礙於今次其中八場草地賽採用B+2欄，揀馬要小心啲，因為除非係好好後勁之馬，否則好難在此跑道有得追。

　　第二場四班1600米。「危險英駿」回降四班，級數不是原班馬可比，此匹近3年經常在三班跑入前列之馬，計佢現時7歲嘞，會退化，落到四班本來已經有得跑，睇睇呢場對手，新新舊舊成員皆有之，大部分卻冇乜近績可言，即係話四班中下級組別咋。所以，既有呢類咁筍嘅場合，苗禮德有便宜點會放過，一定想撈油水！

快樂無窮後勁強

　　第五場四班1200米。「快樂無窮」連續兩場在此程跑得好，前仗得第二名，上仗終於贏馬開齋，如果睇佢末段所造時間，俱在22.1秒或以內，牠在末段的衝刺有多厲害，真係唔使講嘢，所以，唔擔心B+2欄會不利牠。此外，因目前在班內仍不用負重，爭勝條件尚足，加上對手與上仗分別不大，要爭取連捷，阻力有限。

　　第六場三班1200米。「禮尚往來」一連兩場贏馬距離都係少少，驚險有之，卻不覺係符碌，尤其上場更甚，直路曾冇位上之餘，仲要揪到馬頭側晒，咁樣都可睇住隻「明海光輝」嚟食，高唔過人廿分或以上，邊有咁嘅本事，升上三班仍然冇有怕。

點買法

　　正如開場白所講，買後上馬一定要好追得嗰類，「危險英駿」和「快樂無窮」正係獨贏過關對象。買Q則揀第五場，「快樂無窮」梗膽，腳拖１３及１４，如果買三重彩或四連環可考慮埋４、７及８。

資深評馬人　陳華棟