借題發揮：成功改造好過賣廣告 轉倉馬鬥省招牌

魑魅魍魉

　　成日講話「省招牌」，究竟會唔會係外界一廂情願嘅想法？阿Jack則抱着正面看法，新接手練馬師，剃唔剃到人眼眉，未必會好在意，但有兩點好顯淺誘因，令他們着重快快省招牌，其一，如果轉投馬係可改造，從而令該等馬成績翻幾番，何樂而不為呢！至少令馬房增添成績；其二，如果搞得好，該轉投馬嘅親朋戚友，如又係馬主，亦可能心癢癢，一併轉過嚟，而呢類例子，近季我們見得多，所以，有馬來投，唔盡早交代，完全唔合符成本效益。

　　今期賽事比較多轉倉馬初出，一共4駒，順序場次計有沈集成「朗天」、賀賢「氣定神閒」、大摩「伽羅」及姚本輝「中環英雄」，4隻齊齊同日贏晒？發夢冇咁早啦！但當中的確有部分係餐士面，要一出即跑得好，唔係冇可能。

伽羅中環英雄評分有利

　　賀賢接手「氣定神閒」，無故跑場泥地，完全唔跟上手馬房本子辦事（跑開1400及1600米），但打得王牌，證明唔係讓路性質。總之，呢匹馬三班也跑得好，假使唔係冇泥地呢瓣，有權贏埋。「伽羅」及「中環英雄」，本來同為霍利時馬房，一齊出走，而此兩駒公認係有班，只因成績未有突破才轉飯鑊，坦白講，今仗所報路程，並唔係最正宗，但我覺得評分有利大過天，路短亦唔係冇得搏。

Jack