洪禮賢講馬：皇帝旨令 6W在望

猪拉多纳

　　第十場一班1650米泥地。「皇帝旨令」前仗初跑此程已建議一博，理據離唔開三點，其一，覺得佢唔係冇得再上，斷纜嘅賽績未必反映晒評分處境；其二，之前斷纜嗰兩場，人或馬演繹上各有責任，跑輸唔係好關實力問題；其三，未轉飯鑊之前，早有泥地1200米經驗，當時仲未增值，又跑得蝕，一樣輸近，點可能泥地唔掂啊！？結果喺嗰場泥地一哩入Q，以中置型跑法，僅輸頭位畀「萬能駒」，表現更勝預期。

　　之後轉回谷草一哩，賽後被抽秤跑法，個人認為嗰場蔡明紹係就係放得慢，早段至中段陷於失利位置則係自己做成，亦因此，先至會出現中段起焗帶頭嘅後果。今仗用番主帥，轉到此程再嘗試，因排檔好，唔難攞番前仗嗰類靚位，如跑出水準，有望6W。

　　第十一場三班1600米草地。「雨電風雷」計今季賽績，冇可能嚟到季尾仲係得1W喺手，隨便數一數，季初一出同程贏「較量」，後駒至此已3W。而大前仗同程塞車都跑殿軍，喺佢前面過終點係「雄心威龍」、「開心老友」及「逸逸友福」，呢3匹馬今季共獲11W。

　　除非真係馬房勢弱影響，或「雨電風雷」本身係「鱷魚頭」就冇得好講，只要唔再有痰，又唔會無啦啦漏閘，跑1600米想佢有三甲啫，都唔敢寄望贏嘞，應該唔會失望而回啩？！

馬會賽馬節目主持　洪禮賢