內圈探索：大把在手身輕步爽

魑魅魍魉

　　徐雨石馬房今季成績理想，至目前已勝出33場頭馬，當中六場來自泥地賽事，反映此倉口頗喜歡在泥地出擊。今日沙田上演11場賽事，其中四場屬泥地賽，部分場次徐廐亦有惡馬列陣，隨時又有頭馬見面。

　　出爭第九場三班1200米泥地的「大把在手」，上仗跑谷草1200米排在不利的11檔起步，全程走外叠蝕位，結果只以個多馬位不敵頭馬「一定爆」屈居亞軍，演出並不失禮。復課後，此駒備戰仍積極，拍跳走勢出色，埋門踱步走來身輕步爽，勇況未減。今回出戰泥地1200米，過往同程四戰得一W三 Q，可見路有專長，可望一放而返。

　　列陣第十場一班1650米泥地的「萬能駒」，上仗在鄭雨滇胯下出爭同程，以佳速力壓「皇帝旨令」取得季內第二場頭馬，表現出色。拼後至今已有個多月，體力應已回復，近期一直有正常操練，早前試泥地大閘亦有不俗走勢，埋門踱步火旺神生，狀態並冇低落。今回再爭強項泥地一哩，只較上仗多負四磅，預計阻力並不大，吼準皮亞士盃報名，必求贏馬攞威。

家明