高清睇跑馬：喜惑有條件補中

魑魅魍魉

　　第四場五班1400米。「天子駕六」四班表現不差，季初未有一仗輸得遠，其中總場次70全程走三叠望空亦殺入季軍，形勢不利仍入位，表現相當醒，近三戰四班賽演出同樣討好，除了上仗1200米路短輸較遠外，另外兩次都後上跑近，最吸引是總場次480末段締速22.79秒，537場拉士造22.28秒，同樣是全場最快末段時間。再睇總場次444五班1400米一仗，因慢閘被迫留後跑，轉彎及直路要走出最外檔，不像多駒在內檔塞車，形勢雖有利，但不是有實力有卡士，怎可以在B+2欄短直路憑後勁贏馬，今次重返五班1400米是箭頭所指，作膽四平八穩。

　　第八場三班1400米。「喜惑」台型絕佳腳法早熟，首仗即捧為大熱，一檔起步形勢係好，但初出未夠經驗，以致早段太慢，後上不及僅跑第二。再出繼續受熱捧，僅比「旺當家」好分少少，韋達已發揮一絕，十檔起步積極搶前，極速進佔前列好位，然而「旺當家」實在太勁，且步速偏快，跟前形勢不利，再度殺入Q腳已有交代。前仗總場次571加眼罩終於補中，僅勝馬頸位看似驚險，實則入到直路曾受阻，最後二百米才望空，劣勢下樣贏馬稱得上高難度之作，難怪賽後被加八分之多。上仗再次排外檔，三歲馬首次負重磅，再次入Q絕對了不起，且全程走三叠，蝕位兼冇遮擋下跑出1.09.57，比起之前三戰更快，周日增程跑 1400米，有力補中。

Sam