中村俊輔策動水手斷箭

港陌

14/05/2011
文： 走肖

兩隊都係「5戰無敗」，點揀好呢？廣島三箭今日喺日職主場對橫濱水手，平手都要唔過，雖然三箭開季連續5場不敗，但佢哋最近開始行衰運，上星期有兩名主力連環受傷，反觀對家水手今季安排中村俊輔做隊長之後即刻大翻身，教練木村和司仲下令贏波上榜首，戰意無敵值得捧場。（開賽時間：周六下午2:00）




以往用開451陣式嘅廣島三箭，今季改用雙箭頭，安排隊長佐藤壽人同前鋒李忠成拍住上，效果其實相當唔錯，開季後有2勝3和。


三箭兩大守將打柴


之不過咁喎，上星期廣島三箭主場逼和甲府風林一役，開季後長居正選嘅後衞青山敏弘同水本裕貴連環傷出，大家知啦，自從慎野智章轉戰德甲加盟科隆之後，佢哋後防就一直都唔夠人用，依家要擺大個頭仲危險。




相反橫濱水手陣容就完整得多呢，上季長抖嘅射手渡邊千真更加係連續兩場有波入，被譽為超新星嘅小野裕二，上星期後備入替都梅開二度，而且「日本國寶」中村俊輔做咗隊長之後，亦明顯踢得投入咗，教練木村和司更要求球員全力搶3分，協助球隊自2006年3月後首次登上日職聯賽榜榜首，趁住三箭後防大執位，睇怕水手可以延續3勝2和強勢。