借題發揮：加州財子領軍有料到 告東尼大舉出擊

猪拉多纳

　　喺頭馬數字上，莫講話大摩有機會反先告東尼，排在練馬師榜三、四位嘅方仔及阿蔡，目前與東廐相差十餘場頭馬而已，要喺餘下十多期賽事趕上，唔係神話。當然，現時咬得最緊就係大摩，手頭上有58W，只差兩場可成追平頭。但唔知大家有冇發覺，近期大摩出馬量，有時會忽然間縮水，好似上期只得4駒，而早前 20/4以及下周三賽事，都係得3駒出賽。阿Jack明白出馬多唔代表贏馬機會多，不過，有如此安排，可能係回緊氣。

　　但你有你唞，告東尼一於好少理，大馬房繼續一貫作風，出馬多，間唔中夾雜一啲牌面馬，藉此借勢大出擊。情況就好似今期，明星之中嘅明星「加州財子」有份出，另有8匹廐侶跟尾，一睇個陣容，冇理由嘥了明星效應，梗會群起郁手，而查過「加州財子」之前4W，原來當中有3次嘅贏馬日，東廐至少可起孖，由此看來，今期實有戰意！

　　坦白講，「加州財子」點叻，唔使講咁多，4戰未輸過嘛。而其他廐侶之中，「超勁精神」及「成就美麗」比例啱心水，前駒打水戰識飛，如果今日有雨，真係跑高好多；後駒連續兩場泥地一哩非冠即亞，搵到最佳出路，估計回升三班角逐，唔會冇得爭。

Jack