洪禮賢講馬：勁飛駿步步闖威利嘉星運俊爵 勁加勁利駿超勁精神多贏勁駒

猪拉多纳

　　今日賽事可能在天雨影響下進行， 就算場地正常的話， 由於7 場草地係跑C+3欄， 唔易追已成事實，尤其喺季尾，情況更甚。

重心場次：第9場　第一班（105-80分）1000米草地

　　「加州財子」未跑過淋地，可能有影響，如撇開場地因素，直落4W，愈露愈多（實力），上場締造今季最快此程時間，用「恐怖」嚟形容最啱。總之，贏完繼續做嘢，銳意爭5W。「富高勝」上季此程入Q，要拖。

　　「錢照贏」唔使再跑group，仲唔使負重，以佢嘅速度，放入一席唔意外。「明燈」一路有揀開，由於近績穩定，再跟。「風火神駒」大閘時間快而贏得易，喺正常場地跑，一定要拖。「科研精英」谷轉田，壓力大增，除非14檔跑線太有利，如果唔係，限爭三至五名。「好友福」和「活力至寶」跑線失利，TF才考慮。

第1場　第五班（40-0分）1400米草地

　　「好精伶」復課喺準備上嘅態度與前完全唔同，大閘都兩個（末段刻意省上嚟），仲有幾課拍跳，做嘢做到出晒面，今戰態度應向好。「歡心」未轉馬房前，幾十倍已貼，上場輸在放快咗（比另一組快3線），至今仍認為其態況不再甩皮甩骨，轉馬房後亦如是觀，今仗人好檔靚，跟埋呢場。

　　「團隊福星」唔係好信冇長力，一哩可能要擔心，跑1400米而有內檔幫手，估計可應付，加上，近日工夫唔hea，有意圖。「風馳電掣」、「強駒」及「厲行星」，按能力也可一爭。

第2場　第四班（60-40分）1200米泥地

　　「萬人迷」和「仔仔女女」，都係新勝此程，由於兩駒往績上，以前駒多啲根據，秤先一點。

　　「王者先鋒」比較近3仗表現，上場已唔重口，如有泥地，威力比田草更強。「龍船快」剛仗此程沿路三叠，末段尚可湧一湧，今排6檔，如取位好啲，有權上名。「夢幻魔術」最近兩大閘試得輕鬆，可惜12檔，可能好蝕。「宇宙良駒」處身1場早段唔多馬走嘅場合，如果放得順，或可入P。

第3場　第三班（80-60分）1200米草地

　　「勁飛駿」及「星運俊爵」，田泥1200米曾分獲亞季軍，嗰場後駒係沿路二叠稍蝕，由於今仗彼此位好而轉到草地，仍有得鬥。

　　「威利嘉」前仗耐冇跑又傷過，嚴格嚟講，拉士唔係完全冇晒，隔一隔後縮回短途，罕有地安排拍跳工序，或者腳傷陰影冇晒，演出可能大不同。「步步闖」唔係太滿意上場直路發揮，仍輸得接近，大有跟進必要。「化工之昇」檔位比上賽好，亦只限三三四四。

第4場　第五班（40-0分）1400米草地

　　「野馬」操番4、5個月，大閘1個接1個，本來生性唔聽話，加配件後明顯受落，交得番前仗水平，唔會有對手。「駿馬飛騰」屢遇意外，令上場成績略遜於預期，卻證明落五班明顯係有so。

　　「好小子」跑到氣管有血，剛敗唔使理，操住嚟唞，又肯縮番1400米，有誠意。「嘻哈大少」上賽沿途三叠仍可入Q，實績點都要重視。「濰坊」分利，只擔心配搭問題（師徒對上1匹合作馬上名，已數到1/1）。

第5場　第四班（60-40分）1600米草地

　　「勁加勁」仗比仗追得犀利，3歲仔再加程或有風險，睇過上賽拉士時間，應該仲好。「高分貝」如在慢地跑，會畀到前駒好大威脅。

　　「超勁精神」情況與前駒差唔多。「財源來」前仗已揀，但唔鍾意剛賽處理手法，而目前41分，心態要估。「利駿」埋門單試好放鬆，加程唔會帶來反效果。

　　「多贏勁駒」休出兩場，路程及陣上處理完全唔同（上場內欄曾塞車，但肯追），可能只係想累積跑頭，呢次終再上番1600米，要爆係得呢匹減分過籠馬。

第6場　第四班（60-40分）1400米草地

　　「自由萬歲」贏開，工夫喼住做，條件仍足，係重磅略挑剔。「大將軍」和「神童」，一對3歲仔，未熟係事實，不過，1隻好位而跑法進取，另1隻已有此程經驗，可拖。

　　「哈哈大少」唔係騎練太過盲門（上季起田草55次合作得1P），以隻馬目前狀態，冷門諗得過。「幸運來」跑法會賺，只係級數較低。

第7場　第三班（80-60分）1200米泥地

　　「獵豹小子」連贏兩場同程，過程1場比1場誇張，加10分仍要追。「明海光輝」1檔，早段唔會似上場，肯擺前走，隨時入圍。

　　「添福駿驥」轉1400米搶晒口，跑番短合理，其實初出已跑此程，直路食住泥肯追，證明場地性能ok。「火燎腚」和「綠衣郎」邊線腳。

第8場　第三班（80-60分）1400米草地

　　「喜惑」遲早要加程，係驚初跑就要面對外檔及負132磅。「進取」一再認為評分未盡，安排回跑1400米，會比1600米更好衝。

　　「勝利駿駒」上賽前已指出，以此時性能，1600米未必比此程啱，肯縮槓係好事。「叻叻仔」長途馬開氣後加程會好。「快利多」如步速慢，唔易交出十足水準。「千江映月」及「開心自在」，各有憂慮，因前駒埋門工夫疏過，後駒中程能力有疑問。「幸運雄獅」多跑下係冇咁促，終於肯跑中距離，到位。

第10場　第三班（80-60分）1650米泥地

　　「漸信良駒」性格忠心，如泥地唔識，就冇得好講，計噸位，講跑法，應該有得跑。「站站名牌」如果冇咗鬥慢形勢，唔肯定會唔會交到上場水準。「成就美麗」係12檔令信心打折。

　　「創佳績」路合、降班、檔唔差，足以上名。「勁快」113磅或可以下犯上。「華利多」和「勁飛馳」，如遇早段扯得快，末段有行。