波圖大超班加冕雙冠王

魑魅魍魉

18/05/2011
文： Kit

歐霸盃終極戰爆葡超內訌！有啲人認為教波都係紅褲子出身至有說服力，但凡事總有例外，助教出身嘅莫連奴同高普咪係成功例子囉！波圖教練保亞斯依家就正正向呢條成功路進軍喇！呢位仁兄領軍波圖一年嚟，球隊得勝率超過8成，攞聯賽冠軍係實至名歸，今晚都柏林上演歐霸盃決賽遇着對慣對熟嘅布拉加。我梗再撐靚仔少帥，帶領波圖贏波做「雙冠王」。（有線61、64、201及203周四凌晨2:45直播）




早喺葡超仲有5輪未完，波圖就已經篤定冠軍，之後就專心一致踢歐霸盃，結果連西班牙維拉利爾都威脅唔到佢哋！球隊成績咁好，當然要多謝一對箭頭侯克同法卡奧。尤其係法卡奧，似乎踢歐霸盃特別醒神，今屆賽事已經入咗16球，破咗單季歐霸入球紀錄，小妹撐佢今晚可以繼續將紀錄改寫！


布拉加聯賽交手輸晒


布拉加殺入歐霸盃決賽，雖然一路嘅對手唔係好強，但捱得住漫漫長路已經唔簡單。記得季初佢哋喺歐聯附加賽淘汰西維爾殺入分組賽，已經印象好深；由於今季花咗唔少心機喺歐洲賽，所以聯賽成績麻麻。古斯杜迪奧係布拉加中場靈魂，呢個士砵亭青訓出品呢一年喺葡超好出位，但只要波圖嘜實佢，布拉加都好難發惡。




當然，波圖無論以馬爾干彭利拿或者奧達文迪拍路蘭度扼守中路，都唔係銅牆鐵壁！近10場已經失咗15球，閘位沙普拿路亦有傷在身。但布拉加後防都唔多掂，秘魯守衞阿拔圖洛迪古斯肌肉受傷未必踢得，哥迪安奴卡卡隨時要補上，所以1.8倍入球大都可以小注。今晚雙方都互熟波路，波圖喺葡超亦兩勝布拉加，要贏波捧盃應該無問題！


佳同演出準繩穩膽之選


馬仔方面，今個禮拜天雨路滑，要特別留意啲游水馬。小妹今晚心水係第八場「佳同」，自從戴眼罩轉嚟快活谷後演出超準繩，屬馬膽之選。熱門配腳敲「歐洲動力」，前仗出爭同程後上不及跑第三，但末段衝刺強勁，時間僅次於頭馬0.01秒，復課操練更積極，勢必再拚個明白！冷門配腳要埋「帝豪名駒」。