洪禮賢講馬：戶外名駒 氣勢強勁

魑魅魍魉

　　第九場三班1400米。「豐衣足食」跑到季尾仍未有W，冇運係其中1個關鍵位，因接連3場做阿二，所負距離加埋都唔夠半個身位，經常係叮噹馬頭衝輸。如果計埋之前幾場，佢除咗初出嗰場1200米，以及1場1400米（心律不正）外，其實季內場場喺前幾名返嚟，忠心指數幾緊要。當然，可以負面啲咁睇，因累積一段長時間穩陣賽績，季尾可能危危乎，之前連搏多場，體力流失成點？純以操練、臨場等，未必睇得到。所以，呢類馬信與不信，可能因人而異。

　　自己揀得佢，自然企喺樂觀一面，賽績硬淨係首要吸引之處，尚有兩個優點，就係佢跑田草A欄向來有保證（3戰獲1W2Q）。同埋，忽然換配搭或有新衝擊（今季騎練田草合作19次，10場入前四名）。此外，睇番今場形勢，唔好理其他對手點跑，因有兩匹前置型廐侶喺度，早段唔會慢，令佢留後追跑法得以正常發揮，希望今場直路真係會追過晒。

　　第十場二班1600米。鍾意「戶外名駒」，全因上周拍「蓮華生輝」嗰課，拍落夠氣勢，兼且過程好似唔使點用力，雖然佢近仗冇咩好成績，唔代表狀態有咩唔好。今場降至二班跑，對手應該係今季遇過較弱1場，用埋何澤堯，負住中磅跑，進一步擴大優勢。只要周末冇雨，而騎者演繹手法又唔似得近兩仗咁唔妥善，如果留得好，末段實係佢表演嘞！

馬會賽馬節目主持　洪禮賢