里爾聖日耳門又做細界

港陌

21/05/2011
文： 山度士

今日度士轉口味講法甲，榜首里爾上周末於法足盃擊敗巴黎聖日耳門，打破五十六年錦標荒信心返晒嚟，今晚兩軍再碰頭，里爾只要穩打穩紮攞一分已夠封王，以聖日耳門近期疲弱攻力，要擊破對方大門有難度，度士建議捧細盤。（now 634周日凌晨3時直播）




目前法甲爭標形勢，里爾領先次席馬賽六分，今仗唔輸固然可以提早封王，就算佢哋不幸輸波，由於里爾比馬賽多八個得失球差，只要餘下一仗唔好大敗亦好大機會奪標。記得上周末法足盃決賽，里爾雖然贏波，但過程唔算一面倒，里爾全靠完場前由中場奧拜尼亞克一記罰球建功，其實嗰球聖日耳門龍門哥柏有失位之嫌，如果唔係佢犯錯，雙方隨時要踢加時。


里昂返主場「大」開殺戒


度士做過資料搜集，發覺里爾近年作客聖日耳門嘅王子球場戰績一般，連盃賽在內過去六次未贏過，心理上肯定輸蝕，所以預計佢哋都唔敢太冒進。聖日耳門上周於法足盃決賽落敗後，周中補賽亦以○比一不敵波爾多，連續兩仗交白卷，主隊讓平半都冇必勝把握，所以玩入球細仲穩陣。




另一場直播賽事，里昂主場對卡昂，里昂近兩場聯賽只得一分，不過兩場都係作客賽事，返主場表現應該有改善，佢哋現時僅以兩分領先聖日耳門排第三，為保下屆歐聯入場券不容有失。卡昂數字上仍有降班危機，作客亦唔可以太被動，球隊近九場聯賽場場有波入，今場開大機會高。（now 714周日凌晨3時直播）




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。