紐記西布朗皆大歡喜

猪拉多纳

22/05/2011
文： Combo King

英超煞科，幾支護級球隊打餐死，真係戥佢哋辛苦，阿King實在唔忍心睇呢種殘酷場面，一於推介「快樂足球」 紐卡素主場對西布朗，兩軍今仗純粹為排名而戰，冇乜心理包袱，可以踢進攻足球娛樂fans，作為煞科禮物，捧入球大。（有線62台周日晚11時直播）




紐卡素即使早已護級成功，但季尾並冇放軟手腳，上仗作客車路士，戰至最後一刻都未放棄，逼和二比二，令車仔未能於主場贏波謝幕，可見球員鬥心十足。理由好簡單，人望高處，紐卡素陣中不乏優質球員，佢哋仍需要盡最後努力，爭取表現吸引大球會招攬，希望事業更上一層樓，連後衞史提芬泰萊都殺得性起，連續兩場有波入。


熱拿亞煞科起「塞」


西布朗情況亦差唔多，前鋒奧丹維治同中場穆林保都係有料之人，同樣要表現身價博跳槽，戰意有保證。而且西布朗踢法一向有前冇後，近九場有八場開大，再睇雙方近六次對賽有五次開大，數據上亦支持大盤。




意甲亦到最後一輪賽事，帕爾馬季尾弗到漏，近五仗四勝一和，包括擊敗國米同祖記，今仗作客對四連敗嘅卡利亞里，竟然有得受讓，當然捧「讓球客勝」。另外，熱拿亞靠主場搵食，近六次主場贏五仗，今輪主場應可以贏埋切塞納。