洪禮賢講馬：「鑊氣」賽果具摧毀性 季尾沒完沒了

猪拉多纳

　　天有不測之風雲，人有霎時一身痕！機關算盡又如何，嗰刻係唔就，識飛都冇用。剩係睇睇近期部分騎練，嗰期賽事嘅賽前，好似氣勢強，贏梗三兩場，嘩！點知出嚟賽果極具摧毀性及破壞力，1W都冇已經想死咁滯，最終P亦欠奉，損失更多港幣。

　　上周三谷草夜賽，先有柏寶「技驚四座」，當晚7匹坐騎輸晒W，十幾廿蚊獨贏嘅「追月」及「新力多」一樣殊途同歸，三三四四都跑唔到。係啲馬本身有問題（前駒賽後驗到腳痛），定係個別坐騎跑得唔好，其實唔重要，因為結果如一，「鑊氣」堅重囉！

　　啱啱嗰期日馬，「主角」換咗人，輪到大摩發功！全日佢嗰4匹大熱及1匹次熱門，攞吓二三名了事。而尾場「續領風騷」係咪落雨整瓜，又係嗰句，根本探討嚟無謂！因當日喺第三場，「包裝選擇」贏唔到，已經係1個預警，同時，亦係蔡廐大炒嘅先兆。

　　呢類摧毀性嘅現象，相信喺季尾會不時發生，唔同嘅係「主角」誰屬之嘛。大馬房、大騎師又點？冇特權囉！係要「孭鑊」嗰期，任由賽前擺出全攻型，成手馬王也徒然，只因命運早已預備。